وسى رەتتە اقىننىڭ كاتونقاراعايعا ساپارلاپ قايتۋىنىڭ دا ورايى كەلىپ تۇر. «يگى ءىستىڭ باسىنا, جاقسى كەلەر قاسىنا» دەمەكشى, ءدال وسى كۇندەرى كاتونقاراعايدا «التاي – تۇركى الەمىنىڭ التىن بەسىگى» اتتى حالىقارالىق شارا ۇيىمداستىرىلىپ جاتىر. ايتۋلى شارا اياسىندا شىعىستان شىققان قوس جازۋشى قاليحان ىسقاق پەن ديداحمەت ءاشىمحاننىڭ مەرەيتويلارى اتاپ وتىلەدى. سول تويعا وبلىستىق مادەنيەت باسقارماسى وكىلدەرى يران-عايىپ ورازباەۆتى قوناق ەتىپ الىپ بارماقشى. ءسال ەرتەرەكتە قاليحان ىسقاق يران-عايىپ ىنىسىنە «اسقار سۇلەيمەنوۆ ەكەۋىڭدى كاتونعا الىپ بارامىن» دەپ ءجۇرىپتى. سول بويى جول تۇسپەگەن.
– «سىزگە ارمان بولعان التايعا اپارايىق» دەپ جاتىر جىگىتتەر. ويتكەنى, وسكەمەننىڭ ىرگەسىندە بەلوۋسوۆكا كەنتىندە پراكتيكادا ءجۇرىپ, كاتونقاراعايدى كورە الماي كەتكەم. سودان بەرى نەشە جىل ءوتتى, التاي ارمان بولىپ قالعان. مەن «قازاق ادەبيەتى» گازەتىندە ديداشپەن, ديداحمەت اشىمحانمەن جەتى جىل بىرگە قىزمەت ەتتىم. كەرەمەت جۋرناليست بولدى. ال قاليحان ىسقاق پەن اسقار سۇلەيمەن الماتىعا العاش قونىس اۋدارعانىمدا مەنى پويىزدان كۇتىپ الىپ, ءبىر كەيۋانانىڭ ۇيىنە ورنالاستىرعان. ماعان جۇبان مولداعاليەۆ ءۇي الىپ بەرگەنشە قاليحان مەنى «قارا تەنتەك» دەيتىن. ارالاسىپ كەتتىك. كاتونعا نەشە شاقىردى. ءدام تارتپادى. ەندى قۇدايدىڭ قۇلاعىنا ءتيدى مە, وسىدان ەلۋ جىل بۇرىن جازعان «التىن اجال» دەگەن داستانىم ساحنالانادى. سونىڭ دايىندىعىن كورەيىن دەپ كەلدىم. سويتە ءجۇرىپ, ارمان بولعان التايعا بارىپ قايتپاقپىن, – دەيدى اقىن يران-عايىپ ورازباەۆ.
مىنەكي, يران-عايىپ اقىن كاتونقاراعاي اۋدانىنا دا بارىپ, كوزى تىرىسىندە جەزدە دەپ قۇرمەتتەگەن قاليحان ىسقاق پەن ارىپتەس ءىنىسى ديداحمەت ءاشىمحان ۇلىنىڭ رۋحىنا تاعزىم ەتەدى.
شىعىس قازاقستان وبلىسى
