قازاقستان قوعامدىق دامۋ ينستيتۋتىنىڭ مالىمەتىنشە, داۋىس بەرۋ 23 شىلدەگە دەيىن جالعاسادى. وتاندىق اۆتورلاردىڭ ەڭ كوپ وقىلاتىن 100 تۋىندىسى 10 تامىز – اباي كۇنى ۇسىنىلادى.
ايتا كەتەيىك, اتالعان جوبا ۇلتتىق قۇرىلتاي مۇشەلەرىنىڭ ۇسىنىسى بويىنشا بەكىتىلگەن ۇلتتىق كىتاپ كۇنى باستاۋ الدى. پرەزيدەنت قاسىم-جومارت توقاەۆ اتالعان باستاماعا قولداۋ ءبىلدىرىپ, قوعامدا كىتاپ وقۋ مادەنيەتىن دامىتۋدىڭ, سونداي-اق كىتاپتاردىڭ قولجەتىمدىلىگىن قامتاماسىز ەتۋدىڭ ماڭىزىن ايتىپ كەلەدى.
ءىس-شارا بارىسىندا ءسوز العان ءماجىلىس دەپۋتاتى, ۇلتتىق قۇرىلتاي مۇشەسى ايدوس سارىم بۇل باستاما ادەبي تالعامنىڭ قالىپتاسۋىنا ىقپال ەتىپ قانا قويماي, ەلىمىزدەگى كىتاپ وندىرىسىنە بايىپتى باعدار بەرەتىنىن اتاپ ءوتتى.
«ەگەر وسى ساۋالناما ناتيجەسى بويىنشا ءبىز بەلگىلى ءبىر كىتاپتاردىڭ بارلىق جەردە بارىنشا كوپ وقىلاتىنىن بىلەتىن بولساق, اتالعان تۋىندىلاردى قايتا باسىپ شىعارۋعا, ناسيحاتتاۋعا جانە دارىپتەۋگە مۇمكىندىك بەرەدى. مۇنداي ساۋالنامالار – بەيبەرەكەت اقپارات اعىمىنا قارسى تۇرۋدىڭ, ادەبيەتكە تۇراقتى جانە عىلىمي نەگىزدەلگەن تالعام قالىپتاستىرۋدىڭ ءبىر جولى. وزگە مەملەكەتتەردەگى سەكىلدى, ۋاقىت وتە كەلە ءوز قۇندىلىعىن جوعالتپايتىن كىتاپتار ءتىزىمى جاسالادى. ءبىز قوعامدى نە تولعاندىراتىنىن, جاستاردىڭ, اعا بۋىننىڭ قاي جانردى ۇناتاتىنىن ۇعىنا الامىز. بۇل جاي عانا ءتىزىم ەمەس, بۇل – ءداۋىر ايناسى», دەدى ول.
ايدوس سارىمنىڭ ايتۋىنشا, ارالىق قورىتىندى ءارتۇرلى جاستاعى ازاماتتاردىڭ, ءارتۇرلى تىلدە سويلەيتىن توپتاردىڭ تالعامىنا تالداۋ جاساۋعا مۇمكىندىك بەرەدى. سونداي-اق مۇنداي زەرتتەۋلەر باسپاگەرلەرگە قانداي كىتاپتار سۇرانىسقا يە جانە نە نارسەگە نازار اۋدارۋ كەرەك ەكەنى تۋرالى مالىمەت ۇسىنادى. جوبا قازىردىڭ وزىندە ماڭىزدى مادەني وقيعاعا اينالدى. سونىڭ كومەگىمەن بولاشاقتا اۋقىمدى الەۋمەتتىك-مادەني زەرتتەۋلەر جۇرگىزۋگە بولادى.
ايتا كەتەيىك, «100 كىتاپ» جوباسى اياسىندا قاتىسۋشىلاردى ىنتالاندىرۋ ماسەلەسى دە قاراستىرىلعان. «100 كىتاپ» جوباسىنىڭ سەرىكتەسى – «مەلومان-MARWIN» دۇكەندەر جەلىسىنىڭ قولداۋىمەن 9000, 10000 جانە 16000-داۋىس بەرۋشىگە سىيلىق كارتالارى تابىستالدى. بۇل قادام وقىرمانعا ەرەكشە سىي عانا ەمەس, حالىق ءسۇيىپ وقيتىن 100 كىتاپتى تاڭداۋعا ازاماتتاردى بارىنشا كوپ تارتۋعا قوسىمشا ىنتا بولدى. ماسەلەن, 9000-داۋىس بەرۋشى – استانالىق ءجۇسىپ امانتاي, 10000-قاتىسۋشى – قاراعاندىلىق اسەل كوشەن, ال 16000-ازامات – اقتوبەلىك گۇلجان وتەگەنوۆا.
ءيا, «Amanat» پارتياسى كىتاپ وقۋ مادەنيەتىن ىلگەرىلەتۋگە بەلسەندى اتسالىسىپ كەلەدى. 2023 جىلعى قىركۇيەك ايىنان باستاپ پارتيا «كىتاپ-Amanat» جوباسىن قولعا الىپ, سونىڭ اياسىندا ەل اۋماعىندا, اسىرەسە شاعىن قالالار مەن اۋىلداردا 23 كىتاپ ورتالىعى اشىلدى. وندا ادەبي كەشتەر, جازۋشىلارمەن كەزدەسۋلەر, ءتۇرلى بايقاۋ وتەدى. بارلىعى 700-دەن استام ءىس-شارا ۇيىمداستىرىلدى. كىتاپتار نارىق باعاسىنان تومەن باعامەن ساتىلادى.
جالپىۇلتتىق ساۋالناماعا ءار ازامات «eGov Mobile» موبيلدىك قوسىمشاسى ارقىلى داۋىس بەرىپ, ون كىتاپقا دەيىن تاڭداۋ جاساي الادى. ەڭ باستىسى, شىعارمانىڭ اتاۋى مەن اۆتورىن دا كورسەتۋ قاجەت.
