بۇل ەڭبەك – اۆتوردىڭ بۇرىن جارىق كورگەن «تۇلعالار – عاجاپ جاندار» اتتى كىتابىنىڭ جالعاسى. مۇندا ۇلت رۋحانياتىنا سۇبەلى ۇلەس قوسقان قايرات-كەر ازاماتتاردىڭ كىسىلىك كەلبەتى, دەگدار بولمىسى حاقىندا باياندالادى.
تۇساۋكەسەر راسىمىندە ءسوز العان بىرقاتار زيالى قاۋىم وكىلدەرى عاليا بالتابايدىڭ قالام قارىمىن, جۋرناليست رەتىندەگى دارا جولىن ەرەكشە اتاپ ءوتتى.
«بۇل ەڭبەك – جاي عانا ەستەلىك ەمەس, كەلەر ۇرپاققا باعدار بولاتىن قۇندى دۇنيە. 500 بەتتەن اساتىن وسى كىتاپتا جاستارعا ۇلگى بولارلىق تۇلعالار مولىنان قامتىلعان. عاليا اپايدىڭ ەل ءۇشىن جاساعان ەڭبەگى تەك جۋرناليستيكامەن شەكتەلمەيدى. ول – ۇلت مۇددەسىن الدىڭعى ورىنعا قويعان شىنايى قوعام قايراتكەرى. قازاق قىزى رەتىندە ەلگە ءسىڭىرىپ جۇرگەن قىزمەتى – ەكىنىڭ ءبىرىنىڭ قولىنان كەلە بەرمەيتىن ءىس. ءوزى دە, جازعان كەيىپكەرلەرى دە – ۇلتقا شىن جاناشىر جاندار. مۇنداي رۋحاني ەڭبەكتەردى ەلگە جەتكىزىپ, جاريا ەتكەن اۆتورعا العىس بىلدىرەمىن», دەدى پارلامەنت سەناتىنىڭ دەپۋتاتى التىنبەك نۇح ۇلى.
جيىن بارىسىندا عاليا قۇسايىنقىزى جينالعان جۇرتشىلىققا شىنايى ريزاشىلىعىن ءبىلدىرىپ, جىلى لەبىزىن جەتكىزدى. سونىمەن قاتار جاڭا ەڭبەكتىڭ جازىلۋ بارىسى تۋرالى دا قىسقاشا اڭگىمەلەپ ءوتتى.
«تۇلعا باسقا ادامدارعا ۇقسامايدى. ولاردىڭ ومىرگە دەگەن كوزقاراسى ەرەكشە. ونداي جاندار كوپتىڭ ءبىرى ەمەس. وسىنداي جاندار قازىرگى قوعامعا كەرەك. سول سەبەپتى ىلگەرىدەگى جانە ءوزىم كورگەن, مويىنداعان تۇلعالاردىڭ عيبراتتى عۇمىرىن قاعازعا ءتۇسىرۋدى ماقسات ەتتىم. كىتاپقا ەنگەندەردىڭ ءبىرازى كەزىندە گازەت-جۋرنالدارعا شىققان ماقالالارمەن قوسا, جاڭادان جازىلعان دۇنيەلەر. سولار ءار جەردە شاشىلىپ قالماسىن دەپ ءبىر كىتاپقا توپتاستىرعان ەدىم», دەيدى عاليا بالتاباي.
