فوتو: اقوردا
مەملەكەت باسشىسى تاۋار اينالىمىنىڭ تۇراقتى ءوسىپ كەلە جاتقانىن, سونداي-اق ونى ۇلعايتۋعا مول الەۋەت بار ەكەنىن ايتتى. ستاتيستيكاعا سايكەس, بيىلعى ءتورت ايدا ءوزارا ساۋدا-ساتتىق كولەمى 83 ميلليون دوللاردان استى, ال بىلتىر بۇل كورسەتكىش ءتورت ەسە ارتىپ, 375 ميلليون دوللارعا جەتكەن.
«قازاقستان ەكونوميكالىق ىنتىماقتاستىقتى ارتاراپتاندىرۋعا جانە ەنەرگەتيكا, اۋىل شارۋاشىلىعى, دەنساۋلىق ساقتاۋ مەن تۋريزم سالالارىندا بىرلەسكەن ينۆەستيتسيالىق جوبالاردى جۇزەگە اسىرۋعا بەيىل», دەدى قاسىم-جومارت توقاەۆ.
پرەزيدەنت بولگار كومپانيالارىمەن, ينۆەستورلارىمەن ءوزارا ىقپالداستىقتى قولدايتىنىن جەتكىزىپ, بۇل رەتتە ساۋدا-ەكونوميكالىق ىنتىماقتاستىق جونىندەگى ۇكىمەتارالىق كوميسسيا نەگىزگى ءرول اتقاراتىنىنا توقتالدى.
رۋمەن رادەۆ قوناقجايلىق تانىتقانى ءۇشىن ريزاشىلىعىن ءبىلدىرىپ, بولگاريا مەن قازاقستاننىڭ سانقىرلى ىنتىماقتاستىعىنىڭ كوكجيەگىن كەڭەيتۋگە مۇمكىندىك مول ەكەنىن اتاپ ءوتتى.
«بولگاريا قازاقستاندى ورتالىق ازياداعى باستى ستراتەگيالىق سەرىكتەسى سانايدى. تابىستىڭ كىلتى – ىقپالداستىقتا. ەكى ەل, سونداي-اق ەۋروپا وداعى مەن قازاقستان اراسىنداعى قارىم-قاتىناستى دامىتۋدا مەملەكەتتەرىمىزدىڭ ستراتەگيالىق تۇرعىدان ورنالاسۋىنا ارقا سۇيەۋىمىز قاجەت. بۇل ازيا مەن ەۋروپانى بايلانىستىرۋدا ماڭىزدى ءرول اتقارادى», دەدى رۋمەن رادەۆ.
كەلىسسوز بارىسىندا ەكىجاقتى كۇن تارتىبىندەگى ماسەلەلەر كەڭىنەن تالقىلاندى.
تاراپتار سەرىكتەستىكتى ودان ءارى نىعايتۋعا جانە قازاق-بولگار قارىم-قاتىناستارىن دامىتۋعا ىقپال ەتەتىن جاڭا باستامالاردى جۇزەگە اسىرۋ نيەتىن راستادى.
