بەلگىلەنگەن تالاپتارعا سايكەس, ارداگەردە كەم دەگەندە ءبىر وردەنى بولۋى ءتيىس. وسى كريتەريگە سايكەس, وڭىردەن 122 ارداگەردىڭ ءتىزىمى قر مادەنيەت جانە اقپارات مينيسترلىگىنە جولدانىپ, ولاردىڭ ىشىنەن 47-سىنە كەلىسىم بەرىلگەن.
«قازىرگى ۋاقىتتا اۋدان جانە قالا اكىمدىكتەرى قر مادەنيەت جانە سپورت ءمينيسترىنىڭ 2023 جىلعى 1 شىلدەدەگى №211 بۇيرىعىنا سايكەس كوشەلەرگە اتالعان ارداگەرلەردىڭ ەسىمدەرىن بەرۋ جۇمىسىن جۇرگىزىپ جاتىر. بۇل بۇيرىقتا اكىمشىلىك-اۋماقتىق بىرلىكتەرگە, ەلدى مەكەندەردىڭ قۇرامداس بولىكتەرىنە اتاۋ بەرۋ, قايتا اتاۋ, ترانسكريپتسياسىن ناقتىلاۋ جانە وزگەرتۋ كەزىندە ءتيىستى اۋماق حالقىنىڭ پىكىرىن ەسكەرۋ قاعيدالارى بەكىتىلگەن», دەپ مالىمدەدى تۇركىستان وبلىسىنىڭ مادەنيەت باسقارماسى.
جىل سوڭىنا دەيىن تۇركىستان وبلىسىنداعى بارلىق 47 كوشەگە كەڭەس وداعىنىڭ باتىرلارى مەن ەكىنشى دۇنيەجۇزىلىك سوعىس ارداگەرلەرىنىڭ ەسىمى رەسمي تۇردە بەرىلەدى.
سونىمەن قاتار, «مەموريالدىق تاقتالار ورناتۋعا رۇقسات بەرۋ» مەملەكەتتىك قىزمەت كورسەتۋ قاعيدالارىنا (قر مادەنيەت جانە سپورت ءمينيسترىنىڭ 2020 جىلعى 26 مامىرداعى №149 بۇيرىعىمەن بەكىتىلگەن) سايكەس, جەرگىلىكتى اكىمدىكتەر سول كوشەلەر بويىنا اقپاراتتىق تاقتايشالار مەن مەموريالدىق بەلگىلەر ورناتۋمەن اينالىسادى.
ەسكە سالساق, سوعىس ارداگەرلەرىنىڭ ەسىمىن كوشەلەرگە بەرۋ باستاماسى قازاقستان پرەزيدەنتى قاسىم-جومارت توقاەۆتىڭ تاپسىرماسى بويىنشا قولعا الىنعان بولاتىن. ەكىنشى دۇنيەجۇزىلىك سوعىستاعى جەڭىستىڭ 80 جىلدىعىنا وراي رەسپۋبليكالىق ونوماستيكا كوميسسياسى ەل كولەمىندە توپونيمدەردى جاڭارتۋ تۋرالى شەشىم قابىلداعان.
