بيىل بەسىنشى مارتە ۇيىمداستىرىلىپ وتىرعان بۇل ءتۋرنيردىڭ اشىلۋ ساتىندە باتىرجان حاسەنوۆتىڭ تۋىستارى, دوستارى جانە ارىپتەستەرى ءسوز سويلەپ, ونىڭ ادامي بولمىسى مەن قوعامعا سىڭىرگەن ەڭبەگى تۋرالى تەبىرەنە ەسكە الدى.
«باتىرجان – التى بالانىڭ كەنجەسى بولعانىمەن, ءبارىمىزدىڭ ۇلكەنىمىز سياقتى ەدى. ۇلكەنگە دە, كىشىگە دە ۇنەمى قامقور بولىپ جۇرەتىن. ونىڭ ەسىمى تەك وتباسىندا عانا ەمەس, دوستارى مەن شاكىرتتەرىنىڭ جۇرەگىندە ماڭگى ساقتالادى. بيىل بەسىنشى رەت وتكىزىلىپ وتىرعان وسى تۋرنير – سونىڭ ايقىن دالەلى. بۇل سايىستى ۇيىمداستىرۋشىلار – باتىرجاننىڭ دوستارى. ءبىز – وتباسى مۇشەلەرى دە شەت قالماي, جۇلدە قورىنا ۇلەسىمىزدى قوسىپ كەلەمىز. العاشىندا وسى جاسىل الاڭداعى جارىس تەك ەرەسەكتەر اراسىندا وتەتىن. مىنەكي, بيىل تۇڭعىش رەت بالالار اراسىندا ۇيىمداستىرىلىپ وتىر. بالكىم, بۇل دا بەكەر ەمەس شىعار. ويتكەنى باتىرجان وتە بالاجان بولاتىن. كىشكەنتاي فۋتبولشىلاردى جانىن سالىپ جاتتىقتىراتىن, تەك سپورتقا قانا ەمەس, ومىرگە باۋلىپ, اعالىق اقىل كەڭەسىن ايتىپ جۇرەتىن», دەدى باتىرجاننىڭ اپكەسى گۇلنار سەيداحمەتقىزى.
جارىسقا ەلوردانىڭ ءتۇرلى سپورت مەكتەپتەرى مەن فۋتبول ورتالىقتارىنان 2017 جىلى جانە ودان كەيىن دۇنيەگە كەلگەن بالالاردان قۇرالعان 8 كوماندا قاتىستى. ولار كوكتەمنەن بەرى دايىندالىپ, بۇل ءتۋرنيردى اسىعا كۇتكەن. بالالاردىڭ كوزىندەگى جالىن, الاڭعا شىققانداعى سەنىمدى ءجۇرىس – ءبارى بۇل جارىستىڭ ولار ءۇشىن قانشالىقتى ماڭىزدى ەكەنىن اڭعارتتى.
ءتۋرنيردىڭ باستى ەرەكشەلىگى – مۇندا تەك جارىسۋ عانا ەمەس, ومىردەن وتكەن ازاماتتى ۇرپاق جادىندا ساقتاۋ, جاس ويىنشىلاردىڭ جۇرەگىنە ۇلگى بولار تۇلعانى تانىتۋ كوزدەلدى.
جارىس سوڭىندا جەڭىمپازدارعا ديپلومدار, كۋبوكتار مەن باعالى سىيلىقتار تابىستالدى.
