سۋرەتتە تسيفرلى نۇسقاۋلىقتىڭ گرۋزيندىك اۆتورلارى يراكلي گۆينيانيدزە مەن اني سيربيلادزە
استانا مەملەكەتتىك قىزمەت حابى «مەملەكەتتىك كوممۋنيكاتسياداعى جاساندى ينتەللەكت» تسيفرلىق نۇسقاۋلىعىن شىعاردى. بۇل مەملەكەتتىك سەكتورداعى ءباسپاسوز حاتشىلارى مەن قوعاممەن بايلانىس ماماندارىنا ارنالعان العاشقى پراكتيكالىق قۇرال.
قۇجات وسى جىلدىڭ 14-16 مامىرىندا استانادا ورتالىق جانە جەرگىلىكتى مەملەكەتتىك ورگانداردىڭ 50-دەن استام ءباسپاسوز حاتشىسى مەن ءباسپاسوز قىزمەتكەرى قاتىسقان سەمينار-پراكتيكۋم ماتەريالدارى نەگىزىندە دايارلاندى. انىقتامالىقتا جي پايدالانۋ بويىنشا ناقتى قادامدار كورسەتىلىپ, ساراپتالعان جي قۇرالدارى مەن تەحنولوگيالاردى قازىرگى جاعدايدا ەتيكالىق تۇرعىدا, قاۋىپسىز ءارى ءتيىمدى قولدانۋ بويىنشا ناقتى ۇسىنىستار قامتىلعان.
مەملەكەتتىك قىزمەتشىلەردىڭ جۇمىسىنا جاساندى ينتەللەكتتى ەنگىزۋ كۇندەلىكتى تاپسىرمالاردى اۆتوماتتاندىرۋعا, كوممۋنيكاتسيانى ءار جەكە تۇلعاعا باعىتتاي وتىرىپ, قۇرۋعا, قوعامدىق پىكىردى تالداۋدى جاقسارتۋعا مۇمكىندىك بەرەدى. بۇل ءوز كەزەگىندە ازاماتتاردىڭ مەملەكەتتىك ينستيتۋتتارعا دەگەن سەنىمىن ارتتىرادى.
نۇسقاۋلىقتا جي مەملەكەتتىك سەكتورعا تابىستى ينتەگراتسيالاۋ كەيستەرى بەرىلگەن. ەستونياداعى Bürokratt جوباسى مەملەكەتتىك قىزمەتتەرگە جاپپاي قول جەتكىزەتىن بىرىڭعاي تسيفرلىق ورتاق ارنا جاساۋعا كومەكتەسسە, فرانتسيا ازاماتتاردىڭ ميلليونداعان وتىنىشتەرىن وڭدەۋدى دەربەس جاساندى ينتەللەكت Albert ارقىلى جەتىلدىرىپ جاتىر. ال گرۋزياداعى ۇكىمەت جانىنداعى جاساندى ينتەللەكت كەڭسەسى چات-بوتتار, بولجامدى تالداۋ جۇيەلەرى جانە مەملەكەتتىك كوممۋنيكاتسياداعى ەتيكالىق ستاندارتتاردى ەنگىزۋ جۇمىستارىمەن اينالىسادى.
سەمينار ساراپشىلارى جۇرگىزگەن باستاپقى ساۋالنامالار مەن تالداۋلار ناتيجەسىندە جاساندى ينتەللەكت قۇرالدارىن ەنگىزۋ مەملەكەتتىك قىزمەتشىلەرگە مونيتورينگ پەن كونتەنت ازىرلەۋگە جۇمسالاتىن ۋاقىتتى 60-70 پايىزعا قىسقارتۋعا, كۇندەلىكتى پروتسەستەردى اۆتوماتتاندىرۋدى اپتاسىنا 5 ساعاتقا دەيىن جەتكىزىپ, جالپى كوممۋنيكاتسيانى جاقسارتۋعا مۇمكىندىك بەرەتىنى انىقتالدى.
نۇسقاۋلىق استانا مەملەكەتتىك قىزمەت حابىنىڭ تاپسىرىسى بويىنشا گرۋزيا مەن وتان ساراپشىلارى قاتىسۋىمەن ازىرلەندى. ول جاساندى ينتەللەكتتى ءوز قىزمەتىنە ينتەگراتسيالاۋدى كوزدەيتىن مەملەكەتتىك قىزمەتشىلەرگە ارنالعان جانە ەتيكالىق نورمالار, اشىقتىق قاعيداتتارى مەن مادەني كونتەكستى ەسكەرۋ تالاپتارىنا ساي كەلەدى.
