تالقىلاۋعا پارلامەنت سەناتىنىڭ توراعاسى ماۋلەن اشىمباەۆ باستاماشى بولدى. پودكاستقا تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ, inDrive كومپانياسىنىڭ نەگىزىن قالاۋشى جانە باس ديرەكتورى ارسەن تومسكي, سونداي-اق «قازپوشتا» اق باسقارما توراعاسى اسەل جاناسوۆا قاتىستى.
پالاتا سپيكەرى اتاپ وتكەندەي, تسيفرلاندىرۋ جاڭا تەحنولوگيالاردى ەنگىزۋدى عانا ەمەس, ءومىردىڭ بارلىق سالاسىن جۇيەلى تۇردە وزگەرتۋدى كوزدەيدى.
«پرەزيدەنت قاسىم-جومارت توقاەۆ قازاقستاندى جاساندى ينتەللەكت كەڭىنەن قولدانىلاتىن جانە تسيفرلىق تەحنولوگيالاردىڭ دامۋىنا جاعداي جاسالعان ەۋرازيانىڭ تسيفرلىق حابىنا اينالدىرۋدى مىندەت ەتىپ جۇكتەدى. بۇل – بيىك, دەگەنمەن قول جەتكىزۋگە بولاتىن ناقتى ماقسات. ونى ىسكە اسىرۋ ءۇشىن كاسىبي كادرلارعا, زاماناۋي ينفراقۇرىلىمعا جانە ءتيىمدى جاساندى ينتەللەكت شەشىمدەرىنە سۇيەنە وتىرىپ, تولىققاندى تسيفرلىق ەكوجۇيە قالىپتاستىرۋىمىز كەرەك. سوندا عانا قازىرگى جاڭا تەحنولوگيالار زامانىندا ءوزىمىزدىڭ لايىقتى ورنىمىزدى الا الامىز», دەدى م.اشىمباەۆ.
پودكاست بارىسىندا KazLLM ۇلتتىق ءتىل مودەلىن قۇرۋعا, Alem.AI حالىقارالىق جاساندى ينتەللەكت ورتالىعىن ىسكە قوسۋعا, ەلىمىزدە data-ورتالىقتار جەلىسىن دامىتۋعا جانە قازاقستانعا ايماقتاعى ەڭ قۋاتتى سۋپەركومپيۋتەرلەردىڭ ءبىرىنىڭ جەتكىزىلۋىنە قاتىستى ماسەلەلەر دە تالقىلاندى. سونداي-اق قاتىسۋشىلار تسيفرلىق ەگەمەندىك ماسەلەلەرىنە, اتاپ ايتقاندا, تەحنولوگيالىق تاۋەلسىزدىكتەن باستاپ وتاندىق جي ونىمدەرىن جاھاندىق نارىققا ەكسپورتتاۋعا دەيىنگى جۇمىستارعا نازار اۋداردى.
«قازىر الەم اۋقىمدى وزگەرىستەردىڭ تابالدىرىعىندا تۇر. ءبىز وسى ۇدەرىستەن تىس قالماۋىمىز كەرەك. جاساندى ينتەللەكت ۇلكەن مۇمكىندىكتەرمەن بىرگە ايتارلىقتاي سىن-قاتەرلەر دە تۋعىزاتىنى بەلگىلى. سوندىقتان بۇل سالانىڭ دامۋىن ادامداردىڭ, ەلدەردىڭ جانە بۇكىل ادامزاتتىڭ يگىلىگىنە باعىتتاۋ – ءبارىمىزدىڭ ورتاق مىندەتىمىز», دەدى م.اشىمباەۆ.
ايتا كەتەيىك, Taldau Talks – اشىق ديالوگ الاڭى. وندا ەل دامۋىنا قاتىستى ماڭىزدى ماسەلەلەر جانە مەملەكەت باسشىسى جۇكتەگەن مىندەتتەردى ىسكە اسىرۋ جولدارى تالقىلانادى. پودكاستىڭ تولىق نۇسقاسىن مىنا سىلتەمەسى ارقىلى كورۋگە بولادى: https://youtube/D-ZxbIUNq4g
