سارىاعاش اۋدانىنا قاراستى №7 تولە بي اتىنداعى جالپى ءبىلىم بەرەتىن مەكتەپتىڭ 11-سىنىپ وقۋشىسى اقجۇنىس اتاحان الەمنىڭ 36 بەدەلدى ۋنيۆەرسيتەتىنەن وقۋعا شاقىرتۋ الدى. ناقتىراق ايتساق, ول اقش, كانادا, تۇركيا جانە مالايزياداعى جوعارى وقۋ ورىندارىنا قۇجات تاپسىرعان. ونىڭ ىشىندە امەريكا قۇراما شتاتتارىنىڭ – 17, دۋبايدىڭ – 5, تۇركيانىڭ – 6, مالايزيانىڭ – 5 ۋنيۆەرسيتەتى وعان ارنايى گرانت ۇسىنسا, كانادانىڭ ءبىر ۋنيۆەرسيتەتى پرەزيدەنتتىك ستيپەنديامەن وقۋعا قابىلداعان. ۇلتتىق بىرىڭعاي تەستىلەۋدە 111 بالل جيناعان اقجۇنىس قازىر حالىقارالىق قاتىناستار ماماندىعىن تاڭداپ وتىر. ول الداعى ۋاقىتتا حالىقارالىق دەڭگەيدە ءبىلىم الىپ, ەل دامۋىنا ءوز ۇلەسىن قوسۋدى ماقسات ەتەدى.
ال ارىس قالاسىنداعى ء«بىلىم-يننوۆاتسيا» ليتسەيىنىڭ وقۋشىسى ايسۇلتان التىنبەكتىڭ جەتىستىگى تىپتەن اۋقىمدى. ول الەمنىڭ 86 ۋنيۆەرسيتەتىنەن شاقىرتۋ الىپ, جالپى قۇنى 4,6 ميلليون دوللاردى قۇرايتىن گرانت جەڭىپ الدى. اقش, ۇلىبريتانيا, ماجارستان, گەرمانيا, وڭتۇستىك كورەيا, اۋستراليا سىندى ەلدەردەگى جەتەكشى وقۋ ورىندارى ايسۇلتاننىڭ بىلىمىنە جوعارى باعا بەرگەن. اتاپ ايتار بولساق, «Budapest University of Technology and Economics», «Eötvös Loránd University», «University of East London», «Albion College», «Hampshire College», «Drexel University», «DePaul University», «CU Boulder» (University of Colorado Boulder), «Drake University», «Temple University» سىندى وقۋ ورىندارىنىڭ ارىستىق تۇلەككە تاڭداۋى تۇسكەن. بۇل جوعارى وقۋ ورىندارى عىلىم, تەحنولوگيا, بيزنەس جانە الەۋمەتتىك عىلىمدار سالاسىندا الدىڭعى قاتاردا. ال جاس تۇلەكتىڭ ارمانى – ءىت سالاسىندا ەڭبەك ەتىپ, قازاق تىلىندە سايت جاساپ, شەتەلدە وقىعىسى كەلەتىن اۋىل بالالارىنا جول كورسەتۋ. بۇل پلاتفورمادا شەتەلگە وقۋعا ءتۇسۋ, قۇجات جيناۋ, تەستكە دايىندىق تۋرالى ماڭىزدى اقپاراتتار مەملەكەتتىك تىلدە بەرىلەدى.
اقجۇنىس پەن ايسۇلتان – ۇستاز ەڭبەگىنىڭ, اتا-انا مەيىرىمىنىڭ جانە وزدەرىنىڭ قاجىرلى تالپىنىستارىنىڭ ارقاسىندا ءبىلىم-بىلىكتەرىنىڭ حالىقارالىق دەڭگەيدە جوعارى باعالاناتىنىن دالەلدەدى. ولار ەرتەڭگى كۇنى ەلگە ورالىپ, العان ءبىلىمىن تۋعان جەر يگىلىگىنە جۇمسايتىن ازامات بولىپ وسەدى دەگەن سەنىم مول.
