اتالعان مادەني جوبا العاش رەت 2023 جىلى دۇنيەگە كەلگەن بولاتىن. سول كەزدە دە ءار ايماقتان كەلگەن سۋرەتشىلەردىڭ تۋىندىلارى ءبىر الاڭدا توعىسىپ, كورمە ۇلكەن قىزىعۋشىلىق تۋدىردى. ال بيىلعى بيەننالەنىڭ ەرەكشەلىگى – وڭىرلەردەگى تالانتتى اۆتورلاردىڭ باسىن قوسۋ.
«بۇل – ءبىز ءۇشىن وتە ماڭىزدى جوبا. «Qazaq Content» كورمەسىن ءبىر جىل بويى دايىندادىق. ەكى جىل بۇرىن وسى اتاۋمەن العاش رەت كورمە وتكىزگەن ەدىك, وندا ءتۇرلى سۋرەتشىلەردىڭ جۇمىستارىن بىرىكتىردىك. بيىلعى ەرەكشەلىگى – بارلىق وڭىرلەردى ارالاپ, شىعارماشىلىق دەڭگەيى جوعارى, بىراق ءىرى گالەرەيالاردا كورمەگە شىعۋ مۇمكىندىگى شەكتەۋلى سۋرەتشىلەردى ارنايى تاڭدادىق. بۇگىن سىزدەر وسى ەڭبەكتىڭ ناتيجەسىن كورەسىزدەر», دەدى لەيلا ماحات.
كورمەگە ەلىمىزدىڭ ءار وڭىرىنەن كەلگەن بىرقاتار تانىمال جانە دارىندى سۋرەتشىلەر قاتىستى. اتاپ ايتساق, كوكشەتاۋ قالاسىنان ناتاليا بۋلگاكوۆا, ۆلاديمير بىستريتسكي, دۋجان ماعزۇموۆ, رينات ابەنوۆ, سونداي-اق اقتوبە قالاسىنان يلسۋيار كازاكوۆا, الماتىدان ورالبەك كابوكە, ورال قالاسىنان تابيعات قوجانباەۆ, شىمكەنتتەن ەربول زيابەكوۆ, قىزىلوردا قالاسىنان وسپان ءالي بار.
ءىس-شارا اياسىندا ەرەكشە ورىن العان جوبا – فوتوگراف وسپان ءاليدىڭ «Ğasyr» اتتى فوتوكەڭىستىگى بولدى. بۇل – 1 جاستان 100 جاسقا دەيىنگى كەيىپكەرلەردى قامتيتىن, زامانا مەن ادامنىڭ ءوزارا بايلانىسىن كورسەتەتىن اۋقىمدى كوركەم زەرتتەۋ.
كۋراتور لەيلا ماحات بۇل يدەيانىڭ قالاي تۋعانىن ايتىپ ءوتتى. «عاسىر» جوباسى العاش ويىما ۇشاقتا وتىرعاندا كەلدى. استاناعا كەلگەن بويدا بۇل يدەيانى فوتوگراف وسپان اليگە ايتتىم. العاشىندا ول تاڭعالدى. بىراق كوپ ۇزاماي قازاقستاننىڭ تۇكپىر-تۇكپىرىن ارالاپ, 1 جاستان 100 جاسقا دەيىنگى ءتۇرلى جاستاعى كەيىپكەرلەردى فوتووبەكتيۆكە تۇسىرۋگە كىرىستى», دەدى ول.
فوتوگراف وسپان ءالي اتالعان سەريانى جاساقتاۋدىڭ وڭاي بولماعانىن تىلگە تيەك ەتتى.
«بۇل جوبانى جۇزەگە اسىرۋ وڭاي بولعان جوق. ەلىمىزدىڭ ءار وڭىرىنەن ءارتۇرلى ادامداردى كەزدەستىردىم. ولاردىڭ ارقايسىسىنىڭ ومىرگە دەگەن كوزقاراسى, ىشكى كۇيى – مۇلدە بولەك. مۇنى فوتوسۋرەتتەردەن انىق بايقاۋعا بولادى. ءبىز ءدال قازىر وسى عاسىردامىز. بۇل – ءبىزدىڭ عاسىرىمىز. بۇل ادامدار – ءبىزدىڭ ۇلتىمىزدىڭ بەت-بەينەسى», دەيدى اۆتور.
جوبا ءداستۇرلى كورمە فورماتىمەن عانا شەكتەلمەي, جاساندى ينتەللەكت كومەگىمەن ارنايى جازىلعان ءان مەن تسيفرلىق ەلەمەنتتەرمەن تولىقتىرىلدى.
جىبەك بولىسبەك,
ل.ن.گۋميلەۆ اتىنداعى ەۇۋ-دىڭ 3-كۋرس ستۋدەنتى
