فوتو: اشىق دەرەككوز
مينيسترلىكتىڭ مالىمەتىنشە, 1 شىلدەدەن باستاپ كەلەسى وڭىرلەردە جاڭارتىلعان كەزەك نەگىزىندە ۆاۋچەرلەردى ءبولۋ باستالادى. اتاپ ايتساق, تاراز, تۇركىستان, شىمكەنت, ورال, استانا, سەمەي, وسكەمەن, جەزقازعان, قاراعاندى, پاۆلودار, پەتروپاۆل, قوستاناي, قوناەۆ, قوسشى, تالدىقورعان قالالارىندا جانە بايزاق, سارىاعاش, جەتىساي, سايرام, قازىعۇرت, ماقتاارال اۋداندارىندا ۆاۋچەرلىك قارجىلاندىرۋ جۇيەسى قولدانىلادى.
ۆاۋچەر الۋ ءتارتىبى:
- جولدانعان ۆاۋچەر 2 جۇمىس كۇنى ىشىندە راستالۋى ءتيىس. ەگەر راستالماسا, ءوتىنىش بەلسەندى ەمەس دەپ ەسەپتەلەدى. اتا-انا ونى 28 كۇنتىزبەلىك كۇن ىشىندە ءبىر رەت قايتا قالپىنا كەلتىرە الادى.
- تاڭدالعان بالاباقشامەن كەلىسىمشارتتى 5 جۇمىس كۇنى ىشىندە راسىمدەۋ قاجەت.
- ەگەر ۆاۋچەردەن باس تارتىلسا — كەزەك جويىلادى.
- بوس ورىن بولماسا — «كۇتۋ پاراعىنا» تىركەلۋ مۇمكىندىگى بار.
ال قالعان وڭىرلەر ءۇشىن جاس ەرەكشەلىكتەرىنە ساي توپتاردى جاساقتاۋ 1 تامىزدان باستالادى. بوس ورىندار تۋرالى حابارلاما الدىمەن كەزەكتە تۇرعاندارعا جىبەرىلەدى. جولدامانى راستاۋعا 2 كۇن, كەلىسىمشارت جاساۋعا 5 جۇمىس كۇنى بەرىلەدى. قاجەت بولسا, جولدامانىڭ مەرزىمىن 30 كۇنتىزبەلىك كۇنگە دەيىن ءبىر رەت ۇزارتۋعا بولادى.
«ەگەر قۇجاتتاردىڭ تولىق پاكەتى ۇسىنىلماسا, مەرزىمى ءوتىپ كەتكەن بولسا نەمەسە ەكپە الماعان بالالار سانى رۇقسات ەتىلگەن مولشەردەن اسىپ كەتسە, بالاباقشا قۇجاتتاردى قابىلداۋدان باس تارتۋعا قۇقىلى. قۇجاتتاردى الدىن الا تەكسەرىپ, جەكە كابينەتتەگى حابارلامالاردى قاداعالاپ وتىرۋ قاجەت ەكەنى ەسكەرتىلەدى», دەلىنگەن حابارلامادا.
