بۇل – بۋركينا-فاسو سىرتقى ساياسي ۆەدومستۆوسى باسشىسىنىڭ ەكىجاقتى قاتىناستار تاريحىندا قازاقستانعا العاشقى رەسمي ساپارى. وسى قادام سەرىكتەستىكتى جاڭا دەڭگەيگە كوتەرۋگە تىڭ مۇمكىندىكتەر اشادى.
كەزدەسۋ بارىسىندا تاراپتار ساياسي, ساۋدا-ەكونوميكالىق, مادەني-گۋمانيتارلىق سالاداعى كەڭ اۋقىمدى ماسەلەلەردى تالقىلادى. اسىرەسە لوگيستيكا, پايدالى قازبالاردى ءوندىرۋ, تسيفرلاندىرۋ جانە قورعانىس ونەركاسىبى سياقتى بولاشاققا باعىتتالعان سالالارداعى ىنتىماقتاستىقتى ارتتىرۋعا باسىمدىق بەرىلدى.
«افريكا باعىتى – قازاقستان سىرتقى ساياساتىنىڭ ماڭىزدى بولىگى. استانا قۇرلىق ەلدەرىمەن ءوزارا ءتيىمدى جانە تەڭ قۇقىقتى سەرىكتەستىكتى نىعايتۋعا ۇمتىلادى», دەدى م.نۇرتىلەۋ.
سونىمەن قاتار قازاقستان ءسىم باسشىسى بۋركينا-فاسونىڭ الماتىدا ورتالىق ازيا مەن اۋعانستان ءۇشىن ورنىقتى دامۋ ماقساتتارى جونىندەگى بۇۇ وڭىرلىك ورتالىعىن قۇرۋ باستاماسىن قولداعانى ءۇشىن العىس ايتتى.
مينيسترلەر شارتتىق-قۇقىقتىق بازانى تەرەڭدەتۋگە جانە ءارتۇرلى دەڭگەيدەگى ساپارلاردى جانداندىرۋعا ءوزارا مۇددەلىلىگىن راستادى, سونداي-اق حالىقارالىق جانە وڭىرلىك كۇن تارتىبىندەگى وزەكتى ماسەلەلەر بويىنشا پىكىر الماستى.
كەلىسسوزدەر قورىتىندىسى بويىنشا ەكى ەلدىڭ سىرتقى ىستەر مينيسترلىكتەرى اراسىندا ساياسي جانە ديپلوماتيالىق كونسۋلتاتسيالار جونىندەگى مەموراندۋمعا قول قويىلدى. بۇل قۇجات ۆەدومستۆوارالىق ديالوگتى ينستيتۋتسيالاۋ باعىتىنداعى ماڭىزدى قادام بولدى.
بۋركينا-فاسو سىرتقى ساياسي ۆەدومستۆوسى باسشىسىنىڭ ساپارى قازاق-افريكالىق قارىم-قاتىناستاردىڭ قارقىندى دامۋ كەزەڭىنە سايكەس كەلىپ وتىر. كەيىنگى جىلدارى استانادا توگو, كونگو رەسپۋبليكاسى, گۆينەيا-بيساۋ مەن رۋاندانىڭ كوشباسشىلارى, سونداي-اق سەررا-لەونە, بەنين جانە رۋاندانىڭ سىرتقى ىستەر مينيسترلەرى رەسمي ساپارمەن بولدى.
قازاقستان افريكا قۇرلىعىنداعى ءوز ديپلوماتيالىق وكىلدىكتەرىن جۇيەلى تۇردە كەڭەيتىپ, تەڭ قۇقىق پەن ءوزارا قۇرمەت نەگىزىندە بىرلەسكەن ەكونوميكالىق جوبالاردى ىلگەرىلەتىپ كەلەدى.
