فوتو: جاساندى ينتەللەكت
جوبا اياسىندا Baidu كومپانياسى جانۋارلاردىڭ داۋىسىن, قوزعالىسىن, مىنەز-قۇلقىنداعى وزگەرىستەردى تىركەپ, ولاردى الدىن الا وڭدەۋ ارقىلى بەلگىلى ءبىر جۇيەگە كەلتىرەدى. كەيىن بۇل دەرەكتەر جاساندى ينتەللەكت ارقىلى تالدانىپ, ادامعا تۇسىنىكتى اقپارات تۇرىندە ۇسىنىلادى. اتالعان باستاما بويىنشا كومپانيا قىتايدىڭ زياتكەرلىك مەنشىك ۇلتتىق باسقارماسىنا پاتەنتتىك ءوتىنىم تاپسىرعان.
كومپانيا وكىلدەرىنىڭ مالىمدەۋىنشە, جوبا قازىرگى تاڭدا زەرتتەۋ كەزەڭىندە, ناقتى ءونىمنىڭ قانداي بولاتىنى ازىرگە بەلگىسىز.
جانۋارلاردىڭ دىبىستارىن تۇسىنۋگە ۇمتىلعان باستامالار تەك قىتايدا عانا ەمەس, باسقا دا ەلدەردە جۇزەگە اسىپ كەلەدى. ماسەلەن, 2017 جىلى نەگىزى قالانعان Earth Species Project ۇيىمى نەيروندىق جەلىلەر ارقىلى سۇتقورەكتىلەردىڭ دىبىستىق سيگنالدارىن زەردەلەپ كەلەدى.
سول سەكىلدى CETI (Cetacean Translation Initiative) جوباسى 2020 جىلدان باستاپ كاشالوتتاردىڭ قارىم-قاتىناس ادىستەرىن جاساندى ينتەللەكت جانە ستاتيستيكالىق مودەلدەۋ ارقىلى زەرتتەپ ءجۇر. جوبا اياسىندا تەڭىز جانۋارلارىنىڭ دىبىستىق بەلگىلەرىن تالداۋ ارقىلى ولاردىڭ ءوزارا قالاي «سويلەسەتىنى» انىقتالادى.
ال دانيالىق زەرتتەۋشىلەر شوشقالاردىڭ ەموتسيالىق كۇيىن انىقتاۋ ماقساتىندا AI تەحنولوگياسىن قولدانا وتىرىپ, ولاردىڭ قورسىلى مەن رەاكتسياسىن عىلىمي تۇرعىدان زەرتتەگەن.
ساراپشىلاردىڭ پىكىرىنشە, بۇل باعىتتاعى زەرتتەۋلەر ءۇي جانۋارلارىنىڭ كۇيىن تۇسىنۋگە, اۋىل شارۋاشىلىعىنداعى جانۋارلارعا كۇتىم جاساۋ ساپاسىن ارتتىرۋعا, سونداي-اق ەكولوگيالىق جانە ەتيكالىق نورمالاردى ساقتاۋعا ايتارلىقتاي ۇلەس قوسۋى مۇمكىن.
الايدا, جانۋارلار مەن ادامدار اراسىنداعى قارىم-قاتىناستى ناقتى تىلدىك فورماتقا كوشىرۋ ءۇشىن ۇلكەن كولەمدە دەرەك, كوپجىلدىق زەرتتەۋ جانە الەۋمەتتىك-مادەني اسپەكتىلەردى ەسكەرۋ قاجەت. جوبا ناتيجەلەرى ازىرگە تەوريالىق سيپاتقا يە بولعانىمەن, عىلىم مەن تەحنولوگيانىڭ دامۋ قارقىنى بۇل ارماننىڭ ءبىر كۇنى شىندىققا اينالاتىنىن جوققا شىعارمايدى.
ارايلىم مىرزاحان, ەۇۋ ستۋدەنتى
