ماۋسىم ايىندا سالقىن جانە ىستىق اۋا رايى الماسىپ وتىرادى, كەي كۇندەرى نايزاعايلى, بۇرشاقتى, ەكپىندى جەلمەن بىرگە جاۋىن-شاشىن بولادى. كەي كۇندەرى شاڭدى داۋىلدار كۇتىلەدى.
«ماۋسىم ايىنىڭ ءبىرىنشى ونكۇندىگىندە قازاقستاننىڭ بارلىق وڭىرلەرىندە جوعارى تەمپەراتۋرا فونى اياسىندا ءجيى نايزاعايلى قىسقا مەرزىمدى جاڭبىرلار بولجانادى. تەك كەي كۇندەرى تروپيكالىق اۋا ماسسالارىنىڭ ورنىنا سالقىنداۋ اتلانتيكالىق اۋا كەلگەندە ىستىق باسەڭدەيدى. مىسالى, ءبىرىنشى ونكۇندىكتە رەسپۋبليكانىڭ باتىسىندا تۇنگى تەمپەراتۋرا +17…+22°س-تان +7…+12°س-قا دەيىن, كۇندىز +27…+32°س-تان +20…+25°س-قا دەيىن تومەندەيدى. اتىراۋ, ماڭعىستاۋ, اقتوبە, قوستاناي جانە ۇلىتاۋ وبلىستارىندا تۇندە +18…+28°س-تان +12…+23°س-قا دەيىن, كۇندىز +30…+38°س-تان +20…+30°س-قا دەيىن تومەندەيدى, الايدا ونكۇندىكتىڭ سوڭىندا كۇندىزگى تەمپەراتۋرا قايتادان +25…+32°س-قا دەيىن كوتەرىلەدى», دەپ حابارلايدى سينوپتيكتەر.
سولتۇستىك جانە ورتالىق ءوڭىر تۇرعىندارى ءۇشىن دە ىستىقتىڭ باسەڭدەۋى ءبىرىنشى ونكۇندىكتىڭ ورتاسىندا كۇتىلەدى: تۇنگى تەمپەراتۋرا +10…+15°س, سولتۇستىكتىڭ ەڭ شەتىندە +7°س-تان +15…+20°س-قا دەيىن, كۇندىز +25…+30°س-تان +18…+25°س-قا دەيىن اۋىتقيدى.
رەسپۋبليكانىڭ شىعىسىندا ونكۇندىكتىڭ كوپ بولىگىندە تۇنگى تەمپەراتۋرا +10…+15°س شاماسىندا, وڭتۇستىگىندە +20°س-قا دەيىن, كۇندىز +22…+30°س, وڭتۇستىكتە ىستىق +35°س-قا دەيىن, ءبىرىنشى ونكۇندىكتىڭ سوڭىندا, ەكىنشى ونكۇندىكتىڭ باسىندا كۇن سالقىنداي تۇسەدى.
وڭتۇستىكتە جانە جامبىل وبلىسىندا تۇندە دە ىستىق ساقتالادى, تەرمومەتر كورسەتكىشتەرى +20…+28°س-قا دەيىن, كۇندىز +35…+43°س-قا دەيىن كوتەرىلەدى, الايدا ءبىرىنشى ونكۇندىكتىڭ سوڭىندا اۋا تەمپەراتۋراسى ازداپ تومەندەپ, كۇندىز +28…+33°س شاماسىندا بولادى.
رەسپۋبليكانىڭ وڭتۇستىك-شىعىسىندا, الماتى جانە جەتىسۋ وبلىستارىندا تۇنگى اۋا تەمپەراتۋراسى بىرتىندەپ +10…+15°س-تان +15…+20°س-قا دەيىن, كۇندىز +20…+25°س-تان +30…+35°س-قا دەيىن كوتەرىلەدى, تاۋلى ايماقتاردا تۇندە +2…+7°س-تان +7…+12°س-قا دەيىن, كۇندىز +10…+15°س-تان +20…+25°س-قا دەيىن, ونكۇندىكتىڭ ەكىنشى جارتىسىندا كۇندىز +25…+30°س كۇتىلەدى.
«ماۋسىم ايىنىڭ ەكىنشى جانە ءۇشىنشى ونكۇندىكتەرىندە ەلىمىزدىڭ باتىسىندا, وڭتۇستىگىندە, وڭتۇستىك-شىعىسىندا اۋا تەمپەراتۋراسى +33…+40°س-قا دەيىن, ال وڭتۇستىك-باتىس پەن وڭتۇستىكتىڭ ەڭ شەتكى بولىكتەرىندە +43°س-قا دەيىن كوتەرىلەدى, سالقىنداۋ كۇندەرى +22…+27°س-قا دەيىن تومەندەيدى. سولتۇستىكتە, ورتالىقتا جانە شىعىستا تۇنگى تەمپەراتۋرا +15…+23°س-تان +2…+10°س-قا دەيىن, كۇندىز +25…+38°س-تان +15…+27°س-قا دەيىن اۋىتقيدى», دەپ حابارلادى «قازگيدرومەت».
