فوتو: سۋ رەسۋرستارى جانە يرريگاتسيا مينيسترلىگى
سۋ رەسۋرستارى جانە يرريگاتسيا مينيسترلىگى تەكسەرۋ ناتيجەلەرى ءتيىستى شارالار قابىلداۋ ءۇشىن جەرگىلىكتى اتقارۋشى ورگاندارعا جولدانعانىن مالىمدەدى. سونداي-اق جەرگىلىكتى اكىمدىككە انىقتالعان زاڭبۇزۋشىلىقتاردى جويۋ بويىنشا ۇسىنىستار بەرىلگەن.
2025 جىلدىڭ ءبىرىنشى توقسانىندا سۋ رەسۋرستارى جانە يرريگاتسيا مينيسترلىگىنىڭ باسسەيندىك ينسپەكتسيالارى جۇرگىزگەن 20 تەكسەرۋ ناتيجەسىندە 26 زاڭبۇزۋشىلىق انىقتالىپ, 10 ۇيعارىم شىعارىلعان. وسى فاكتىلەرگە قاتىستى جالپى سوماسى 13,3 ملن تەڭگەنى قۇرايتىن 133 اكىمشىلىك ايىپپۇل سالىنعان.
سالا ءمينيسترى نۇرجان نۇرجىگىتوۆ 10 ماۋسىم كۇشىنە ەنەتىن جاڭا سۋ كودەكسىندە زاڭبۇزۋشىلىقتارعا قاتىستى جازا كۇشەيتىلەتىنىن اتاپ ءوتتى.
«جاڭا سۋ كودەكسىنە سايكەس, باسسەيندىك ينسپەكتسيالار قاداعالاۋ جانە جەدەل ارەكەت ەتۋ شارالارىن قابىلداۋ قۇقىعىنا يە بولادى. سونىمەن قاتار سۋ كودەكسىنە سايكەس, اكىمشىلىك كودەكسكە دە وزگەرىستەر ەنگىزىلىپ, سۋ زاڭناماسىن بۇزعاندارعا جازالاۋ شارالارى كۇشەيتىلەدى», دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.
ايتا كەتەيىك, بىلتىر باسسەيندىك ينسپەكتسيالار 439 تەكسەرۋ جۇرگىزىپ, ونىڭ بارىسىندا 1 855 زاڭ بۇزۋشىلىق انىقتالىپ, 429 ۇيعارىم شىعارىلعان. جالپى سوماسى 48,4 ملن تەڭگەگە 582 اكىمشىلىك ايىپپۇل سالىنعان.
