بىرىڭعاي تولەم قۇجاتى – سۋ مەن ەلەكتر ەنەرگياسىنان باستاپ ينتەرنەت پەن قوقىس جيناۋعا دەيىنگى بارلىق تولەمدەردى بىرىكتىرەتىن جيىنتىق تۇبىرتەك. وسىلايشا, ازاماتتار كوپتەگەن بولەك تولەمدەردىڭ ورنىنا بىرەۋى بولادى, بۇل تولەم پروتسەسىن ايتارلىقتاي جەڭىلدەتەدى جانە ۋاقىتتى ۇنەمدەيدى.
تسيفرلىق تەحنولوگيالاردىڭ بەلسەندى دامۋىن ەسكەرە وتىرىپ, چەكتى ونلاين رەجيمىندە قابىلداۋعا جانە تولەۋگە مۇمكىندىك بەرەتىن بتق ەلەكتروندىق نىسانىنا ەرەكشە نازار اۋدارىلادى. ودان بولەك, ءداستۇرلى ادىستەردى ۇناتاتىن ازاماتتارعا ىڭعايلى بولۋ ءۇشىن قاعاز نۇسقاسىن الۋ مۇمكىندىگى ساقتالادى.
بۇگىنگى كۇنى بتق قامتۋى ايتارلىقتاي كەڭەيدى. بىرىڭعاي ەسەپ ايىرىسۋ ورتالىقتارىنىڭ (بەاو) سانى ءۇش ەسەگە ارتىپ, ەلىمىزدىڭ بارلىق 20 ايماعىن قامتيدى. بىرىڭعاي تۇبىرتەك قازىردىڭ وزىندە استانا مەن الماتىدا بارلىق كوممۋنالدىق قىزمەت تۇرلەرىن قامتيتىن جۇمىس ىستەيدى. شىمكەنتتە سۋمەن جابدىقتاۋ جانە گازبەن جابدىقتاۋ قىزمەتتەرىن بىرىڭعاي تولەم قۇجاتىنا ەنگىزۋ جۇمىستارى باستالدى – قازىرگى ۋاقىتتا تولەم قۇجاتىندا ەلەكتر ەنەرگياسى, سۋ, جىلۋ, قوقىس شىعارۋ, ينتەرنەت جانە بايلانىس بار.
وڭىرلەردە, اسىرەسە, الماتى, باتىس قازاقستان, تۇركىستان جانە پاۆلودار وبلىستارىندا بتق اۋقىمىن كەڭەيتۋ جۇمىستارى بەلسەندى تۇردە ءجۇرىپ جاتىر.
جالپى, بىرىڭعاي تولەم قۇجاتى وبلىستىق ماڭىزى بار 34 قالانى, 126 اۋداندى جانە 3 200-دەن استام اۋىلدى قامتيدى. كوپتەگەن وبلىس ورتالىقتارىندا وعان بارلىق التى نەگىزگى كوممۋنالدىق قىزمەتتەر كىرەدى: سۋ, ەلەكتر, جىلۋ, گاز, قوقىس شىعارۋ جانە ينتەرنەت. مىسالى, قاراعاندى, قوستاناي, پەتروپاۆل سياقتى قالالاردا بىرىڭعاي تولەم قۇجاتى كوممۋنالدىق قىزمەتتەردىڭ بارلىق ءتىزىمىن قامتيدى.
اۋداندىق باعىنىستاعى 48 قالانىڭ 28-ىندە بتق ەنگىزىلگەن. وسىلايشا, قاراعاندى وبلىسىنداعى اباي جانە اقمولا وبلىسىنداعى اقكول قالالارىندا تۇرعىندار بارلىق التى قىزمەت بويىنشا بىرىڭعاي تولەم قۇجاتىن الادى. سەرگەەۆكا, جىتىقارا جانە توبىل قالالارىندا بىرىڭعاي تولەم قۇجاتى سۋ, ەلەكتر, جىلۋ جانە قاتتى تۇرمىستىق قالدىقتاردى شىعارۋدى قامتيدى.
جۇمىس جالعاسۋدا – بۇرىن بتق پايدالانىلماعان وبلىستىق ماڭىزى بار تاعى 4 قالا, 63 اۋدان جانە 3000-عا جۋىق اۋىل بار, وندا جۇمىستار ىسكە اسىرۋ ساتىسىندا. ودان بولەك, ليفتتەرگە تەحنيكالىق قىزمەت كورسەتۋ, دوموفوندار, بەينەباقىلاۋ, سونداي-اق مەنشىك يەلەرىنىڭ قاۋىمداستىعى جانە قاراپايىم سەرىكتەستىك قىزمەتتەرى سياقتى قوسىمشا تۇرعىن ءۇي قىزمەتتەرىن بتق-عا ەنگىزۋ بويىنشا جۇمىستار جۇرگىزىلۋدە.
