بۇل بىرەگەي جوبا توتەنشە جاعدايلار ءمينيسترى گەنەرال-مايور شىڭعىس ءارىنوۆتىڭ باستاماسىمەن جۇزەگە اسىرىلدى, ول سەل قاۋىپسىزدىگىنىڭ ۇلتتىق جۇيەسىن جاڭعىرتۋ باعىتىنداعى ماڭىزدى قادام بولدى.
قر تجم «قازسەلدەنقورعاۋ» باس باسقارماسىنا جاڭا تۇرعىن ءۇي مودۋلدەرىن بەرۋ ءراسىمى توتەنشە جاعدايلار ءمينيسترى گەنەرال-مايور شىڭعىس ءارىنوۆتىڭ, «قازسەلدەنقورعاۋ» باسشىسى, «قازاقستاندىق قۇتقارۋشىلار قورى» جەكە قورىنىڭ ديرەكتورى, الماتى قالاسى جانە الماتى وبلىسى تجد باستىقتارىنىڭ قاتىسۋىمەن ءوتتى. بىرەگەي جوبانى «قازاقستاندىق قۇتقارۋشىلار قورى» جەكە قورى قولدادى, بۇل قاۋىپسىزدىك جۇيەسىن نىعايتۋداعى قوعامدىق قاتىسۋدىڭ ماڭىزدىلىعىن كورسەتەدى.
ء«بىز ەڭ قيىن جاعدايلاردا قىزمەتكەرلەرىمىزگە جايلىلىق پەن قاۋىپسىزدىكتى قامتاماسىز ەتۋدە جاڭا باستاما اشۋدامىز. بۇل كاپسۋلا ۇيلەرى تەك زاماناۋي تەحنولوگيالار عانا ەمەس, بۇل تابيعي قاۋىپتەرگە قارسى تۇراقتىلىقتى ارتتىرۋعا ناقتى ۇلەس. ءدال وسىنداي شەشىمدەر بولاشاق تجم تۇلعاسىن انىقتايدى. مۇنداي زاماناۋي تاسىلدەر ەلىمىزدىڭ دايىندىعىن ارتتىرۋ جولىنداعى ماڭىزدى قادام ەكەنىنە سەنىمدىمىن», - دەپ شىڭعىس ءارىنوۆ اتاپ ءوتتى.
جاڭا كاپسۋلا ۇيلەرى سۋ تاسقىنى مەن سەل بەلسەندىلىگىنىڭ جوعارىلاۋى كەزەڭىندە تاۋلىك بويى مونيتورينگ جۇرگىزۋ ەرەكشە ماڭىزدى بولىپ تابىلاتىن قول جەتىمدىلىگى قيىن جانە بيىك تاۋلى اۋداندارداعى باقىلاۋشىلاردىڭ ەڭبەك جاعدايلارىن تۇبەگەيلى جاقسارتۋعا ارنالعان.
ءاربىر تۇرعىن مودۋل اۋدانى 24 شارشى مەتر ءۇش فۋنكتسيونالدىق سەكتوردان تۇرادى: جۇمىس ايماعى, بازالىق جيھازى بار سانيتارلىق-تۇرمىستىق جانە جاتىن بولمەلەر. مودۋل اۆتونومدى جىلىتۋمەن, جارىقتاندىرۋمەن جانە ەنەرگيامەن جاراقتالعان, سونداي-اق بيىك تاۋلى پايدالانۋ تالاپتارىنا سايكەس جىلىتىلىپ قىمتالعان. سونىمەن قاتار باقىلاۋ بەكەتتەرىنىڭ اۋماعىندا جاس اعاش كوشەتتەرى وتىرعىزىلدى.
يننوۆاتسيالىق مودۋلدەردى ەنگىزۋ پيلوتتىق فورماتتا جۇزەگە اسىرىلۋدا, بۇگىنگى كۇنى ول ءوزىنىڭ تيىمدىلىگىن كورسەتتى. بولاشاقتا باستامانى كەڭەيتۋ جانە باسقا ستراتەگيالىق ماڭىزدى بيىك تاۋلى گيدروبەكەتتەرگە وسىنداي كاپسۋلا ۇيلەر ورناتۋ جوسپارلانۋدا. بۇل ەلىمىزدىڭ بارلىق اۋماعىندا بىرىڭعاي جاڭعىرتىلعان مونيتورينگ جەلىسىن قۇرۋعا مۇمكىندىك بەرەدى.
