- باكۋدە شاعىن فۋتبولدان ءوتىپ جاتقان الەم چەمپيوناتىنىڭ توپتىق ءتۋرنيرىنىڭ سوڭعى ماتچىندا ەلىمىزدىڭ قۇراماسى اقش-تان 5:3 ەسەبىمەن باسىم ءتۇستى. بىراق وسى جەڭىستىڭ ءوزى اياقدوپ شەبەرلەرىمىزگە پلەي-وفف سايىسىنا جولداما الۋعا جەتكىلىكسىز بولدى. ءوز توبىندا بوسنيا مەن گەرتسەگوۆينا, پولشانى العا جىبەرگەن جەرلەستەرىمىز ءۇشىنشى ورىن الىپ, اتالعان جارىستى اياقتادى.
- استانادا ايەلدەر كۇرەسىنەن ەل كۋبوگى جولىنداعى جارىس اياقتالدى. جارىستا مىنا بۇرىمدىلار التىننان القا تاقتى: 50 كگ – سۆەتلانا انكيچەۆا (استانا), 53 كگ – يرينا جانىبەكوۆا (قاراعاندى), 55 كگ – ءزۇلفيا ياحياروۆا (قاراعاندى), 57 كگ – لاۋرا الماعامبەتوۆا (قوستاناي), 59 كگ – ۆيكتوريا حۋساينوۆا (اقمولا), 62 كگ – تىنىس دۋبەك (الماتى وبلىسى), 65 كگ – ەلەنا شالىگينا (استانا), 68 كگ – بەيبىت سەيدۋالى (شىمكەنت), 72 كگ – ءالبينا قايىرگەلدينوۆا (اقمولا), 76 كگ – ەلميرا سىزدىقوۆا (قاراعاندى).
- استانادا كوركەم گيمناستيكادان ەلىمىزدىڭ چەمپيوناتى ءوز مارەسىنە جەتتى. جەكەلەگەن كوپسايىستا ايىم مەيىرجانوۆا (استانا) التىننان القا تاقسا, ەريكا جايلاۋوۆا (استانا) مەن ميلانا پارفيلوۆا (شىمكەنت) ەكىنشى, ءۇشىنشى ورىنداردى ەنشىلەدى. توپتىق جاتتىعۋدا ەلوردالىق ارۋلار الدارىنا جان سالمادى. ولار جالپىكوماندالىق ەسەپتە دە جەكە-دارا كوش باستادى.
- رەسەيلىك سوفيا لانسەرەمەن جۇپ قۇرعان ساندۋعاش كەنجەباەۆا قىتايدىڭ مانشان قالاسىندا ۇيىمداستىرىلعان ITF تۋرنيرىندە توپ جاردى. فينالدا ولار مەيكي گو (قىتاي)/پەانگتارن پليپۋەچتى (تايلاند) 6:3, 3:6, 10:8 ەسەبىمەن ۇتتى. بۇل – ساندۋعاشتىڭ بيىلعى ماۋسىمداعى ءتورتىنشى تيتۋلى. بۇعان دەيىن قازاق تەننيسشىسى تۇركيانىڭ انتالياسىندا وتكەن ءۇش تۋرنيردە باس جۇلدەنى ولجالادى.
- ماۋسىم ايىنىڭ العاشقى ونكۇندىگىندە گەرمانيادا ترەكتەگى ۆەلوسپورتتان ءتورت بىردەي ءدۇبىرلى دودا وتەدى. ولار – «Bahnen-Tournee» (1 ماۋسىم), «Oberhausener Nachtrennen» (6 ماۋسىم), «Bahnen-Tournee Darmstadt» (7-8 ماۋسىم), «Dudenhofen» (9 ماۋسىم). نەمىس جەرىندەگى جارىستا ەل نامىسىن راميس دىنمۇحامەدوۆ, الىشەر جۇماقان, يليا كارابۋتوۆ, اندرەي چۋگاي, كيريلل كۋرديدي, رامازان مۇحتار, دانيار شاياحمەتوۆ سىندى ۆەلوشاباندوزدار قورعايدى.
