«AlphaEvolve»-تىڭ باستى ەرەكشەلىگى – ۇلكەن تىلدىك مودەلدەردىڭ (LLM) شىعارماشىلىق قابىلەتى مەن اۆتوماتتى باعالاۋ الگوريتمدەرىن بىرىكتىرۋ ارقىلى ۇزدىك شەشىمدەردى ىرىكتەپ, جەتىلدىرىپ وتىرۋىندا تۇر. پايدالانۋشى بەلگىلى ءبىر ەسەپتى شەشۋ ءۇشىن باستاپقى الگوريتم مەن ناقتى باعالاۋ شارتتارىن ەنگىزگەننەن كەيىن, AlphaEvolve جۇيەسى جۇزدەگەن, ءتىپتى مىڭداعان ءتۇرلى شەشىمدەردى ۇسىنىپ, ولاردىڭ ىشىنەن ەڭ ءتيىمدىسىن تاڭداپ الادى. وسىلايشا جۇيە ۋاقىت وتە كەلە بىرتىندەپ ەڭ ۇزدىك ءارى ءتيىمدى الگوريتمدەر جيىنتىعىن قالىپتاستىرادى.
تەحنولوگيا قازىردىڭ وزىندە تاجىريبەدە قولدانىلىپ ۇلگەردى. ماسەلەن «AlphaEvolve» جۇيەسى «Google» كومپانياسىنىڭ جاساندى ينتەللەكتىگە ارنالعان تەنزورلىق وڭدەۋ بلوكتارىنىڭ (TPU) ديزاينىن جەتىلدىرۋگە كومەكتەسىپ, ەسەپتەۋىش رەسۋرستاردى 0,7 پايىزعا ۇنەمدەۋگە مۇمكىندىك بەرگەن. سونداي-اق, يننوۆاتسيالىق جۇيە ماتريتسا كوبەيتۋدىڭ بۇرىننان تانىمال, نەمىس ماتەماتيگى فولكەر شتراسسەن 1969 جىلى اشقان ادىسىنەن جىلدامىراق ەسەپتەيتىن جاڭا الگوريتم جاساپ شىقتى. بۇل ەسەپتەۋلەر بۇگىندە نەيروندىق جەلىلەردى وقىتۋدا كەڭىنەن قولدانىلادى. ساراپشىلار «AlphaEvolve»-تىڭ باسقا دا بەلگىلى ارنايى ماقساتتاعى الگوريتمدەردەن, مىسالى, بۇرىن ۇسىنىلعان «AlphaTensor»-دان اسىپ تۇسكەنىن ايتىپ وتىر. حالىقارالىق عىلىمي قاۋىمداستىق وكىلدەرى جۇيەنى جوعارى باعالاپ, ونىڭ عىلىمنىڭ كوپتەگەن سالاسىندا قولدانۋعا بولاتىنىن ايتادى.
«DeepMind» وكىلدەرى الداعى ۋاقىتتا «AlphaEvolve» جۇيەسىن عىلىمي قوعامداستىق ءۇشىن قولجەتىمدى ەتۋدى جوسپارلاپ وتىرعانىن مالىمدەدى. بۇل جاساندى ينتەللەكتىنىڭ ادامزات الدىندا تۇرعان كۇردەلى مىندەتتەردى شەشۋدە ماڭىزدى سەرىكتەسكە اينالاتىنىنىڭ تاعى ءبىر دالەلى بولماق.
