حاكاتوننىڭ باستى ماقساتى – IT سالاسىنداعى جاڭاشىل شەشىمدەردى تابۋ, تاجىريبە الماسۋ, جاس مامانداردىڭ كاسىبي جانە الەۋمەتتىك بايلانىسىن ارتتىرۋ. قاتىسۋشىلار ءبىر كۇن ىشىندە يدەيادان باستاپ تولىققاندى پروتوتيپكە دەيىنگى ۆەب-ءونىم ازىرلەپ, ونى UX/UI-ديزاين, يننوۆاتسيا, فۋنكتسيونالدىق جانە پراكتيكالىق ماڭىزدىلىعى سىندى 10 ءتۇرلى كريتەري بويىنشا قورعاۋى ءتيىس.
«قاتىسۋشىلار ازىرلەيتىن ۆەب-قوسىمشا ءبىلىم بەرۋ ۇيىمدارىنا ارنالعان. تاپسىرمالار الدىن الا قۇپيا ساقتالىپ, رەسپۋبليكالىق دەڭگەيدەگى تاۋەلسىز ساراپشىلار توبى دايىنداعان», دەدى وبلىستىق ءبىلىم باسقارماسى تەحنيكالىق جانە كاسىپتىك ءبىلىم بەرۋ ءبولىمىنىڭ باسشىسى قارلىعاش اسايموۆا.
ايتا كەتەيىك, حاكاتونعا كەلگەندەردىڭ اراسىندا تاجىريبەلى جاستار دا بار. ماسەلەن, جەزقازعاننان كەلگەن «ULWeb» كومانداسىنىڭ مۇشەسى انتونينا گازانيان IT سالاسىندا قىزداردىڭ دا بيىك بەلەستەردى باعىندىرا الاتىنىن دالەلدەگىسى كەلەتىنىن ايتقان.
«باعدارلامالاۋ – شىدامدىلىقتى تالاپ ەتەتىن سالا. قىزدار دا تاباندىلىق تانىتا الادى. اقشادان بۇرىن ءوز قابىلەتىمدى دالەلدەۋ ماڭىزدى. ءبىز قورىقپايمىز – تەك مۇمكىندىك كەرەك», دەدى ول.
وبلىستىق ءبىلىم باسقارماسىنىڭ اقپاراتتىق تەحنولوگيالار ورتالىعىنىڭ جەتەكشىسى ەلنار ۇتۇباەۆتىڭ ايتۋىنشا, قاتىسۋشىلارعا ءۇش ءتۇرلى تاپسىرما ۇسىنىلعان.
«ولاردىڭ قاتارىندا كاسىپكەرلەرگە ارنالعان سۋبسيديا مەن گرانتتاردى ىرىكتەۋ, مانساپتىق مۇمكىندىكتەردى تالداۋ سەرۆيسى جانە جاڭالىقتاردىڭ شىنايىلىعىن تەكسەرۋ قۇرالى بار. ءار كوماندا وزىنە ىڭعايلى ءبىر جوبانى تاڭدايدى. جۇمىستار 20:00-گە دەيىن IT-حابتا جۇرگىزىلەدى, بىراق تۇندە دە جالعاستىرۋعا رۇقسات ەتىلگەن», دەدى جەتەكشى.
ايتا كەتەيىك, بۇگىن جەڭىمپازداردى ماراپاتتاۋ ءراسىمى Ertis Promenade ساحناسىندا وتەدى. جۇلدە قورى – 3,5 ميلليون تەڭگە قۇرايدى.
