فوتو: ادىلەت مينيسترلىگى
ءىس-شارانى ادىلەت ءمينيسترى ەرلان سارسەمباەۆ اشىپ, قازاقستاننىڭ زياتكەرلىك مەنشىكتى ورنىقتى دامۋ, ينۆەستيتسيالىق احۋالدى جاقسارتۋ جانە ءادىل ويىن ەرەجەلەرىن قالىپتاستىرۋ ءۇشىن ستراتەگيالىق رەسۋرس رەتىندە قارايتىنىن اتاپ ءوتتى. مينيستر جاساندى ينتەللەكتتىڭ جەدەل دامۋى اياسىندا اۆتورلار, ازىرلەۋشىلەر مەن قوعام مۇددەلەرىنىڭ تەپە-تەڭدىگىن ساقتاۋ ماسەلەسىنىڭ ماڭىزىن ەرەكشە اتاپ ءوتتى.
پانەلدىك سەسسيادا دۇنيەجۇزىلىك زياتكەرلىك مەنشىك ۇيىمىنىڭ (دزمۇ) باس ديرەكتورى دارەن تانگ قازاقستانعا العاشقى رەسمي ساپارىمەن كەلگەنىن ايتتى. ول قازاقستاننىڭ وسى سالاداعى بولاشاققا باعدارلانعان جانە تەڭگەرىمدى ساياسات جۇرگىزىپ وتىرعانىن, سونىمەن قاتار جاساندى ينتەللەكت پەن تسيفرلىق ەكونوميكا جاعدايىندا زياتكەرلىك مەنشىك جۇيەلەرىن ترانسفورماتسيالاۋ بويىنشا جاھاندىق پىكىرتالاستارعا بەلسەندى قاتىسىپ وتىرعانىن جوعارى باعالادى.
پىكىر الماسۋعا فرانتسيا مەن سولتۇستىك ماكەدونيانىڭ مينيسترلەرى, مالايزيا مەن قىتايدىڭ دەلەگاتسيالارى, سونداي-اق حالىقارالىق ۇيىمداردىڭ وكىلدەرى – ەۋرازيالىق پاتەنت ۆەدومستۆوسىنىڭ پرەزيدەنتى جانە ەۋرازيالىق ەكونوميكالىق كوميسسيانىڭ ءمينيسترى قاتىستى. ۇكىمەتتىك ەمەس سەكتور اتىنان Meta كومپانياسىنىڭ وكىلى الگوريتمدىك شىعارماشىلىق پەن گەنەراتيۆتى كونتەنتكە بايلانىستى اۆتورلىق قۇقىقتاردى قورعاۋ تەتىكتەرىنىڭ جاڭا باعىتتارىن ۇسىندى.
سەسسيا زياتكەرلىك مەنشىكتىڭ بولاشاعى تۋرالى ستراتەگيالىق كوزقاراستاردى ورتاعا سالعان مازمۇندى پىكىرتالاس الاڭىنا اينالدى. وندا اۆتورلىق قۇقىق ۇعىمدارىن قايتا قاراۋ, قۇقىقتاردى قورعاۋ مەن يننوۆاتسيالاردى ىنتالاندىرۋعا ارنالعان يكەمدى رەتتەۋ تەتىكتەرىن ازىرلەۋدىڭ وزەكتىلىگى اتاپ ءوتىلدى.
قازاقستان ءادىل ءارى ءتيىمدى زياتكەرلىك مەنشىك جۇيەسىن قالىپتاستىرۋ جولىندا اشىق حالىقارالىق ديالوگ جۇرگىزۋ ارقىلى ءوزىنىڭ بەلسەندى ۇستانىمىن تاعى دا دالەلدەدى.
