فوتو: اقوردا
ء«سىزدىڭ بۇل ساپارىڭىز – ەكىجاقتى ىنتىماقتاستىعىمىزداعى ايتۋلى وقيعا. ءبىز ءوزارا بايلانىسقا, دوستىق پەن سەنىمگە قۇرىلعان قارىم-قاتىناسقا ايرىقشا ءمان بەرەمىز. يتاليا قازاقستاننىڭ الەمدەگى ساۋدا سەرىكتەستەرىنىڭ ۇشتىگىنە كىرەدى جانە ەۋروپاداعى ءىرى ارىپتەسىمىز. بۇل بەكەر ەمەس. ەكىجاقتى ىنتىماقتاستىقتىڭ جوعارى قارقىنىن ساقتاۋىمىز قاجەت. ءسىزدىڭ ساپارىڭىز قوس ەل اراسىنداعى كوپقىرلى ىقپالداستىقتى دامىتۋعا تىڭ سەرپىن بەرەتىنى ءسوزسىز», دەدى قاسىم-جومارت توقاەۆ.
مەملەكەت باسشىسى استانا حالىقارالىق فورۋمىنىڭ ارنايى سەسسياسىنا قاتىسقانى ءۇشىن يتاليا پرەمەر-مينيسترىنە ريزاشىلىعىن ءبىلدىردى.
ءوز كەزەگىندە دجوردجا مەلوني بۇل ساپاردىڭ قازاقستان مەن يتاليا قارىم-قاتىناسىن جانداندىرۋعا ىقپال ەتەتىنىن ايتتى.
«ەلىڭىزگە شاقىرىپ, قوناقجايلىق تانىتقانىڭىز جانە استانا حالىقارالىق فورۋمىندا ءسوز سويلەۋگە مۇمكىندىك جاساعانىڭىز ءۇشىن تاعى دا العىس ايتامىن. بۇل فورۋم ديالوگ ءۇشىن ماڭىزدى الاڭداردىڭ بىرىنە اينالىپ كەلەدى. ءبىز قازاقستاندى يتاليانىڭ ستراتەگيالىق سەرىكتەسى, ال ورتالىق ازيا ءوڭىرىن ستراتەگيالىق تۇرعىدان ماڭىزدى توعىز جولدىڭ تورابى رەتىندە قاراستىرامىز. بىزگە ديالوگ قاجەت. مۇنى ءوزىڭىز دە جاقسى تۇسىنەسىز. قازاقستان – يتاليانىڭ كوپتەگەن سالا بويىنشا ماڭىزدى ارىپتەسى. ەكى ەل اراسىنداعى ىنتىماقتاستىق تابىستى دامىپ كەلەدى. ايتسە دە, كەشە ايتقانىمداي, ەنەرگەتيكادان باستاپ مادەنيەتكە دەيىن, ۋنيۆەرسيتەتتەردىڭ تاجىريبە الماسۋى, حالىقتار اراسىن جاقىنداتۋ باعىتتارىندا بۇدان دا جوعارى ناتيجەگە قول جەتكىزۋگە مۇمكىندىك بار», دەدى يتاليا پرەمەر-ءمينيسترى.
كەزدەسۋدە ساۋدا-ەكونوميكالىق جانە ينۆەستيتسيالىق ىقپالداستىقتى كەڭەيتۋ پەرسپەكتيۆاسى تالقىلاندى. ەنەرگەتيكا, اسا ماڭىزدى ماتەريالدار, اۋىل شارۋاشىلىعى, ونەركاسىپ, كولىك-لوگيستيكا, سونىمەن قاتار جاڭارتىلاتىن قۋات كوزدەرى سالالارىندا بايلانىس ورناتۋ ماسەلەلەرى ەگجەي-تەگجەيلى قاراستىرىلدى. بۇدان بولەك, وڭىرلىك جانە حالىقارالىق كۇن تارتىبىنە قاتىستى پىكىر الماستى.
