فوتو: اشىق دەرەككوزدەن
دەنساۋلىق ساقتاۋ جۇيەسىن تسيفرلاندىرۋ سالاعا تەك جاڭا تەحنولوگيالاردى ەنگىزۋ دەگەن ءسوز ەمەس. بۇل – مەديتسينالىق كومەكتىڭ ساپاسىنا, ازاماتتارعا كورسەتىلەتىن قىزمەتتەردىڭ قولجەتىمدىگىنە تىكەلەي اسەر ەتەتىن ستراتەگيالىق باعىت. سونىمەن قاتار دەنساۋلىق ساقتاۋ سالاسىنداعى قارجىلاندىرۋدىڭ تيىمدىلىگىن قامتاماسىز ەتۋگە مۇمكىندىك بەرەتىن تەتىكتەردىڭ ءبىرى. بۇگىندە ەلىمىزدە مەملەكەتتىك بيۋدجەت جانە مەديتسينالىق ساقتاندىرۋ قورىنىڭ قارجىلاندىرۋى ارقىلى 1900-گە جۋىق مەديتسينالىق ۇيىم جۇمىس ىستەيدى. وسى ۇيىمدار 20 ملن استام وتانداسىمىزعا مەديتسينالىق كومەك كورسەتەدى. سونىڭ ىشىندە ديناميكالىق باقىلاۋداعى جانە الەۋمەتتىك وسال توپتارداعى 700 مىڭ ازامات بار. ولارعا 19 ملن استام تەگىن دارىلىك رەتسەپتەر بەرىلگەن. 370 مىڭعا جۋىق ايەلگە جۇكتىلىگىنە بايلانىستى ءتيىستى مەديتسينالىق قىزمەتتەر كورسەتىلەدى. جۋىردا وتكەن ءباسپاسوز ءماسليحاتىندا دەنساۋلىق ساقتاۋ ۆيتسە-ءمينيسترى ەربول وسپانوۆ تسيفرلاندىرۋ باستامالارى جايىندا ايتىپ بەردى.
ء«بىرىنشى جوبا – پاتسيەنتتەردى تسيفرلىق سايكەستەندىرۋگە قاتىستى. بىلتىر ءبىز بۇل جوبانى پيلوتتىق رەجىمدە ىسكە اسىرعانبىز. وسىعان قازىردىڭ وزىندە 1 800-دەن استام مەديتسينالىق ۇيىم قوسىلدى. جۇيەنى كۇن سايىن 80 مىڭنان استام قىزمەتكەر پايدالانادى. جىل باسىنان بەرى ولار 66 ملن استام قابىلداۋ وتكىزدى. ناتيجەسىندە مەديتسينالىق قىزمەتتەر كولەمى 11,5%-عا ازايدى. جۇيە زاڭسىز كورسەتىلەتىن قىزمەتتىڭ كولەمىن ازايتتى. قارجى جاعىنان بۇل 2,5 ملن تەڭگەگە دەيىن ۇنەمدەۋگە مۇمكىندىك بەردى», دەدى ە. وسپانوۆ.
مەديتسينالىق قىزمەتكەرلەر ءتۇرلى اقپاراتتىق جۇيەلەردەگى قۇجاتتاردى نەمەسە قاعاز قۇجاتتاردى تولتىرۋعا كەلگەندە كوپ ۋاقىت جۇمسايدى. وسىعان وراي, مەديتسينالىق اقپاراتتىق جۇيەلەردى ينتەگراتسيالاۋ جانە مودەرنيزاتسيالاۋدىڭ ارقاسىندا مەديتسينا قىزمەتكەرىنىڭ جۇكتەمەسى 40%-عا ازايعان. وسىعان دەيىن دارىگەرلەر 4 اقپاراتتىق ءجۇيەدە جۇمىس ىستەسە, قازىر ءبىر عانا جۇيەنى پايدالانادى. سونداي-اق مەديتسينالىق قۇجاتتار, انىقتامالار تسيفرلىق فورماتقا اۋىستىرىلىپ جاتىر. قازىر 5 قۇجات تسيفرلىق فورماتتا ۇسىنىلادى. وسى جىلى تاعى 3 قۇجات تسيفرلىق فورماتقا اۋىسادى ەكەن. بۇرىن تەك قاعاز جۇزىندە رەسىمدەلگەن مەديتسينالىق انىقتامالار, مىسالى, 073/ۋ (كولىك جۇرگىزۋ ءۇشىن), 075/ۋ (مەديتسينالىق تەكسەرۋ), بالانىڭ دەنساۋلىق پاسپورتى جانە جەكە جۇمىسشىلارعا ارنالعان مەديتسينالىق كىتاپشالار ەندى ەلەكتروندى فورماتتا قولجەتىمدى. ولاردى eGov ارقىلى الۋعا بولادى. بۇل – زاڭسىز بەرىلىپ جاتقان قۇجاتتار اينالىمىن قىسقارتۋعا مۇمكىندىك بەرەدى. تسيفرلاندىرۋ باعىتىندا ىسكە اسىپ جاتقان جۇمىستاردىڭ ءجون-جوباسى وسىنداي.
