فوتو: primeminister.kz
پرەمەر-مينيستر ءوزىنىڭ العى سوزىندە ستراتەگيالىق ارىپتەستىك قازاقستان-يتاليا مەملەكەتتەرى باسشىلارىنىڭ كۇش-جىگەرى ارقاسىندا قارقىندى دامىپ كەلە جاتقانىن اتاپ ءوتتى. ەنەرگەتيكا, ماشينا جاساۋ, حيميا ونەركاسىبى, فارماتسەۆتيكا, اوك جانە باسقا دا سالالاردا تابىستى ىنتىماقتاستىق ورناعان.
بىلتىر ەكىجاقتى ساۋدا كولەمى 25%-عا ارتىپ, $20 ملرد-قا جۋىقتادى, ونىڭ ىشىندە وتاندىق تاۋارلار ەكسپورتى $18 ملرد-تان اسقان. وسى جىلدىڭ ءبىرىنشى توقسانىنىڭ قورىتىندىسى بويىنشا تاۋار اينالىمى $4,4 ملرد-تى قۇراعان. سونداي-اق يتاليا ەۋروپالىق وداق ەلدەرى اراسىندا قازاقستاننىڭ ەڭ ءىرى ينۆەستورلارىنىڭ بەستىگىنە كىرەدى. نەبارى 20 جىل ىشىندە قازاقستان ەكونوميكاسىنا مۇناي-گاز سالاسى, «جاسىل» ەنەرگەتيكا, ماشينا جاساۋ جانە اوك سالاسىنداعى جوبالاردى جۇزەگە اسىرۋعا $7,6 ملرد يتاليالىق ينۆەستيتسيالار سالىندى.
پرەمەر-مينيستر ۇكىمەت يتاليالىق ينۆەستورلارعا بىرلەسكەن جوبالاردى جۇزەگە اسىرۋدا جان-جاقتى كومەك كورسەتۋگە دايىن ەكەنىن باسا ايتتى.
«قازاقستان ۇكىمەتى ەلىمىزدىڭ ينۆەستيتسيالىق تارتىمدىلىعىن ارتتىرۋ بويىنشا جۇيەلى جۇمىس جۇرگىزىپ كەلەدى. ءبىزدىڭ زاڭنامادا ينۆەستورلار ءۇشىن سالىقتىق جانە كەدەندىك جەڭىلدىكتەردى, زاتتاي گرانتتار مەن ينفراقۇرىلىمدى دامىتۋدى قولداۋدى قوسا العاندا, ىنتالاندىرۋلار قاراستىرىلعان. سونىمەن قاتار ءبىز ۇزاقمەرزىمدى سەرىكتەستىكتى قامتاماسىز ەتۋ ءۇشىن ينۆەستورلاردىڭ پىكىرلەرى نەگىزىندە قولداۋ شارالارىن ۇنەمى جەتىلدىرۋگە تىرىسامىز. يتاليالىق بيزنەستىڭ قازاقستانداعى قاتىسۋىن كەڭەيتۋگە جانە ەكونوميكانىڭ باسىم سەكتورلارىنداعى بىرلەسكەن جوبالارعا بەلسەندى قاتىسۋعا شاقىرامىز», دەپ اتاپ ءوتتى ولجاس بەكتەنوۆ.
بيزنەس-فورۋم قورىتىندىسى بويىنشا ەكونوميكانىڭ ءتۇرلى سالالارىنداعى كووپەراتسيا تۋرالى بىرقاتار قۇجاتقا قول قويىلادى دەپ جوسپارلانعان.
