فورۋمعا باتىس قازاقستان وبلىسىنىڭ اكىمى ناريمان تورەعاليەۆ, وبلىستىق ءماسليحات توراعاسى مۇرات مۇقاەۆ, وبلىستىق ءبىلىم باسقارماسىنىڭ باسشىسى ەلدوس سافۋللين, «ورلەۋ» بقو فيليالىنىڭ ديرەكتورى سوفيا ىزمۇحانبەتوۆا, ارداگەر ۇستازدار, دارىندى وقۋشىلار جانە ولاردىڭ اتا-انالارى قاتىستى. شاراعا 800-گە جۋىق ادام جينالدى.
جيىنعا قاتىسۋشىلار فورۋم الدىندا ۇيىمداستىرىلعان ارنايى كورمەدە 10 وقۋشىنىڭ عىلىمي جوباسىمەن جاقىن تانىستى. ال سالتاناتتى بولىمدە 78 وقۋشى مەن 76 پەداگوگتىڭ جەتىستىگى اتالىپ, ولار العىس حاتپەن جانە گۇل شوعىمەن ماراپاتتالدى.
فورۋم سوڭىندا سوتسياليستىك ەڭبەك ەرى كەنجەبەك مەڭداليەۆ اتىنداعى مەكتەپ وقۋشىسى سايدا ءابۋحانوۆا ءسوز سويلەدى.
«مەنىڭ بۇل جەڭىستەرىم ءجاي عانا ناتيجە ەمەس, ۇلكەن تاجىريبە بولدى. وزىمە سەنىمىم كۇشەيىپ, كوپتەگەن دوستار تابۋىما, جاڭا مۇمكىندىكتەر الەمىنە ەسىك اشۋىما كومەكتەسكەن ەرەكشە ءسات بولدى. ارينە, بۇل جەتىستىگىمە ۇستازىم ديانا ازاماتقىزىنىڭ قوسقان ۇلەسى زور. ول مەنىڭ ۇستازىم عانا ەمەس, ءارى اقىلشىم, ءارى سەنىمدى دوسىم سەكىلدى. سول كىسىنىڭ قولداۋىمەن, باعىتتاۋىمەن مەن قاراپايىم اۋىل بالاسى دا وسىنداي ۇلكەن جەڭىسكە جەتە الاتىنىن دالەلدەي الدىم. بىزگە ءبىلىم بەرگەن التىن ۇيا مەكتەبىمنىڭ بارلىق ۇستازىنا العىس ايتامىن. ءبىلىم مەن عىلىمعا كورسەتىلگەن زور قامقورلىعى ءۇشىن مەملەكەتىمىزگە, وبلىس باسشىلارىنا ريزاشىلىعىمىز شەكسىز. وسى ءۇمىتتى اقتاۋعا تىرىسامىز», دەدى جالپاقتال اۋىلىنان كەلگەن جاس ۇلان.
ءوڭىر باسشىسى ەلىمىزدە جانە وبلىستا ءبىلىم سالاسىندا جاسالىپ جاتقان جۇمىستارعا توقتالدى. اقجايىقتىق وقۋشىلاردىڭ ءبىلىم سالاسىنداعى تابىستارىنا جوعارى باعا بەرىپ, ۇزدىك وقۋشىلار مەن ۇستازداردى ەرەكشە ىقىلاسپەن قۇتتىقتادى. باتىس قازاقستان وبلىسىندا «كەلەشەك مەكتەپتەرى» جوباسى اياسىندا بىلتىردان بەرى 3 وقۋ ورنى اشىلدى. جىل سوڭىنا دەيىن تاعى 6 ءبىلىم ورداسى بوي كوتەرەدى. ال الداعى جىلى كۇردەلى جوندەۋدەن ءوتىپ, جاڭاراتىن عيماراتتار قاتارىندا سايدا وقيتىن كەنجەبەك مەڭداليەۆ اتىنداعى مەكتەپ عيماراتى دا بار.
باتىس قازاقستان وبلىسى
