ەنداۋمەنت-قورلاردىڭ قىزمەتى ماجىلىستە تالقىلاندى

ءماجىلىس دەپۋتاتى جۇلدىز سۇلەيمەنوۆانىڭ ايتۋىنشا, نىسانالى كاپيتال قورلارى (ەنداۋمەنت-قورلار) تۋرالى جانە وسى سالاعا قاتىستى بىرقاتار زاڭنامالىق اكتىلەرگە وزگەرىستەر ەنگىزۋدى كوزدەيتىن زاڭ جوبالارى ەلىمىزدە مۇنداي قورلاردى قۇرۋ مەن دامىتۋ ءۇشىن قۇقىقتىق نەگىز قالىپتاستىرادى.

«اتالعان زاڭ جوبالارى مەملەكەت باسشىسىنىڭ تاپسىرماسىن ىسكە اسىرۋ شەڭبەرىندە ۇكىمەت تاراپىنان ازىرلەنىپ, 2024 جىلدىڭ 27 ناۋرىزىندا ماجىلىسكە ەنگىزىلدى. 2025 جىلدىڭ 16 ساۋىرىندە جالپى وتىرىستا ءبىرىنشى وقىلىمدا ماقۇلداندى», دەدى دەپۋتات.

دەپۋتاتتىڭ ايتۋىنشا, زاڭ جوباسى اياسىندا جۇمىس توبىنىڭ تالقىلاۋى بارىسىندا بىرقاتار ماڭىزدى تۇزەتۋلەر ەنگىزىلگەن. اتاپ ايتقاندا:

• اكتيۆتەردى سەنىمگەرلىك باسقارۋعا بەرۋ شەگى 15 000 اەك-تەن 10 000 اەك-كە دەيىن تومەندەتىلدى;

• اكىمشىلىك-شارۋاشىلىق شىعىستاردىڭ شەكتى كولەمى ينۆەستيتسيالىق تابىستىڭ 30%-ىنان 15%-ىنا, ال اكتيۆتەردىڭ ورتاشا تازا قۇنىنىڭ 1%-ىنان 0,5%-ىنا دەيىن قىسقارتىلدى;

• قور الۋشىنىڭ جازباشا كەلىسىمىن الۋ تالابى ەنگىزىلدى;

• قولدانىستاعى قورلاردى قايتا تىركەۋدى مىندەتتەيتىن وتپەلى نورمالار الىنىپ تاستالدى;

• قامقورشىلىق كەڭەس پەن اتقارۋشى ورگاننىڭ وكىلەتتىكتەرى ناقتىلاندى;

• م ۇلىك پەن زياتكەرلىك مەنشىك وبەكتىلەرىن باسقارۋ ءتارتىبى ناقتى ايقىندالدى.

سونىمەن قاتار, ىلەسپە زاڭ جوباسى اياسىندا كەلەسى زاڭنامالارعا وزگەرىستەر ەنگىزىلدى:

• «اۋديتورلىق قىزمەت تۋرالى» زاڭ – ەنداۋمەنت-قورلاردى مىندەتتى سىرتقى اۋديت جۇرگىزىلەتىن ۇيىمدار قاتارىنا قوسۋ;

• «بۋحگالتەرلىك ەسەپ پەن قارجىلىق ەسەپتىلىك تۋرالى» زاڭ – قورلاردى قوعامدىق مۇددە تانىتاتىن ۇيىمدار رەتىندە تانۋ;

• «عىلىم جانە عىلىمي-تەحنيكالىق ساياسات تۋرالى» زاڭ – مەملەكەت قاتىسپاي قۇرىلعان اكادەميالاردىڭ اتاۋىندا «ۇلتتىق» ءسوزىن قولدانۋعا تىيىم سالۋ.

«بۇل تۇزەتۋ بويىنشا, ەگەر وسىنداي اكادەميالار ءبىر جىل ىشىندە اتاۋىن وزگەرتپەسە, ولار ۋاكىلەتتى ورگاننىڭ سوتقا جۇگىنۋى ارقىلى تاراتىلۋى مۇمكىن», دەپ ءتۇسىندىردى دەپۋتات.

سونىمەن قاتار, تۇركىستان وبلىسىنداعى كەنتاۋ قالاسى مەن وعان ىرگەلەس ەلدى مەكەندەر (بۇرگەم, اششىساي, حانتاعى, بايىلدىر, قارناق, قۇشاتا جانە شاشتوبە) ەكولوگيالىق احۋالدىڭ الدىن الۋ ايماعى دەپ تانىلاتىن بولدى. بۇل وزگەرىس «ارال وڭىرىندەگى ەكولوگيالىق قاسىرەت سالدارىنان زارداپ شەككەن ازاماتتاردى الەۋمەتتىك قورعاۋ تۋرالى» زاڭعا ەنگىزىلدى.

ءماجىلىس دەپۋتاتتارى زاڭ ءماتىنىن زاڭ تەحنيكاسى تالاپتارىنا سايكەستەندىرۋ ءۇشىن بىرقاتار رەداكتسيالىق وزگەرىستەر دە ەنگىزدى.

«قۇقىقتىق اكتىلەر تۋرالى» زاڭنىڭ 24-بابىنا سايكەستىك ماقساتىندا, زاڭ جوبالارىنىڭ اتاۋلارى ناقتىلاندى, دەدى جۇلدىز سۇلەيمەنوۆا.

پارلامەنت ءماجىلىسىنىڭ بارلىق كوميتەتتەرى زاڭ جوبالارى بويىنشا وڭ قورىتىندى بەردى. كوميتەتتىڭ جۇمىس توبى 20 وتىرىس, ال كەڭەيتىلگەن قۇرامدا 2 وتىرىس وتكىزگەن. قورىتىندى سالىستىرۋ كەستەسىنە سايكەس, نەگىزگى زاڭ جوباسى بويىنشا 174, ال ىلەسپە زاڭ جوباسى بويىنشا 24 تۇزەتۋ ەنگىزىلگەن.

«سوندىقتان وسى زاڭ جوبالارىن قابىلداپ, پارلامەنت سەناتىنا جىبەرۋدى سۇرايمىن», دەپ قورىتىندىلادى دەپۋتات جۇلدىز سۇلەيمەنوۆا.