«2025 جىلعى 23 مامىردا الماتى وبلىسىنداعى «ازيا اگرو فۋد» قۇراماجەم زاۋىتى اۋماعىندا ورىن العان قايعىلى وقيعا سالدارىنان ارىپتەستەرىمىزدىڭ قازا تاپقانى تۋرالى زور كۇيزەلىسپەن جانە قايعىمەن حابارلايمىز. بۇل وقيعا بۇكىل كومپانيامىز ءۇشىن اۋىر سوققى بولدى. ءبىز تەك قىزمەتكەرلەرىمىزدەن عانا ەمەس, ۇجىم ومىرىندە تەرەڭ ءىز قالدىرعان ادال, ەڭبەكقور ءارى ادامگەرشىلىگى جوعارى جانداردان ايىرىلدىق», دەلىنگەن حابارلامادا.
«ازيا اگرو فۋد» مارقۇمداردىڭ تۋىستارى مەن جاقىندارىنا شىن جۇرەكتەن كوڭىل ايتادى.
ء«بىز بۇل قايعىنى بىرگە بولىسەمىز جانە وسىنداي قيىن كەزەڭدە وتباسىلارعا بارىنشا قولداۋ كورسەتۋگە تىرىسامىز. زاڭدا جانە كورپوراتيۆتىك باعدارلامالاردا قاراستىرىلعان ساقتاندىرۋ تولەمدەرىنەن بولەك, كومپانيا تاراپىنان مارقۇمداردىڭ وتباسىنا قوسىمشا ماتەريالدىق كومەك كورسەتىلەدى. جەرلەۋ راسىمدەرىنە بايلانىستى بارلىق شىعىندى ءوز موينىمىزعا الامىز, سونداي-اق مارقۇم ارىپتەستەرىمىزدىڭ مۇمكىن بولاتىن قارىزدارىن تولىق وتەيمىز. ءاربىر وتباسىنا پسيحولوگيالىق جانە قۇقىقتىق كومەك بەرىلەدى, قاجەت بولعان جاعدايدا جەكە كومەك تە ۇيىمداستىرىلادى», دەپ مالىمدەدى كومپانيا وكىلدەرى.
كومپانيا جان-جاقتى كومەك كورسەتۋگە ۋادە بەردى.
قازىرگى ۋاقىتتا وقيعانىڭ سەبەپتەرىنە بايلانىستى مۇقيات تەرگەۋ جۇمىستارى جۇرگىزىلىپ جاتىر.
بۇعان دەيىن «ازيا اگرو فۋد» باسشىلىعى 23 مامىر كۇنى جىبەك جولى اۋىلىندا جارىلىس بولعانىن راستاعان بولاتىن. الدىن الا مالىمەت بويىنشا, وقيعاعا ۇن توزاڭىنىڭ جارىلىسى سەبەپ بولعان, بۇل ءورتتىڭ تۇتانۋىنا اكەلگەن. كومپانيا باسقارما توراعاسى سايان اشەنوۆ قازىرگى ۋاقىتتا وقيعانىڭ بارلىق ءمان-جايىن انىقتاۋ ءۇشىن ىشكى تەكسەرۋ جۇرگىزىلىپ جاتقانىن حابارلادى.
ايتا كەتەيىك, جارىلىس سالدارىنان ءبىر ادام مەرت بولعان. تاعى ءۇش جۇمىسشى اۋىر كۇيىك الىپ, دەنەلەرىنىڭ 80–90%-ىن كۇيىك شالعان. بارلىعى جەدەل تۇردە جانساقتاۋ بولىمىنە جەتكىزىلگەن.
