«Almaty Horse and Polo Club» ات سپورتى كلۋبىنىڭ «اقبۇلاق» اتشابارىندا ۇيىمداستىرىلعان جارىسقا ەلىمىزدىڭ ءار ايماعىنان 16-23 جاس ارالىعىنداعى 156 سپورتشى قاتىستى. جارىستىڭ سالتاناتتى اشىلۋىندا الماتى وبلىستىق دەنە شىنىقتىرۋ جانە سپورت باسقارماسى باسشىسىنىڭ مىندەتىن اتقارۋشى راحمان شاحاربەك كوكپاردىڭ تامىرىن كوشپەلىلەر داۋىرىنەن تارتاتىن ەرەكشە سپورت ءتۇرى ەكەنىن اتاپ وتە كەلىپ: «ەلىمىزدە ۇلتتىق سپورت تۇرلەرى قارقىندى دامىپ كەلەدى. كوكپار – حالقىمىزدىڭ مۇراسى, تاريحى, ماقتانىشىمىز. بۇل سايىس ەر مىنەزدى, باتىلدىقتى, كوماندالىق رۋحتى قالىپتاستىرادى», دەدى.
«چەمپيونات ۇلتتىق جاستار قۇراماسىنا ۇزدىكتەردى ىرىكتەۋگە ارنالعان. كوكپار تەك ءداستۇر عانا ەمەس, ۇلكەن جەڭىستەرگە اپارار جارقىن جول ەكەنىن جاستار بىلۋگە ءتيىس», دەدى رەسپۋبليكالىق «كوكپار» فەدەراتسياسىنىڭ پرەزيدەنتى ايداربەك قوجانازاروۆ. سونداي-اق ول كوكپار ليگاسىن قۇرۋ, كلۋبتىق جارىس جۇيەسىنە كوشۋ ارقىلى ۇلتتىق سپورت ءتۇرىن دامىتۋ جاڭاشا سيپات العانىن ءمالىم ەتتى.
جارىس قورىتىندىسىندا جامبىل وبلىسىنىڭ كوكپارشىلارى جەڭىمپاز اتاندى. 2-ورىندى شىمكەنت قالاسىنىڭ كومانداسى يەلەندى. ۇزدىك ۇشتىكتى الماتى وبلىسىنىڭ جاستار كومانداسى تۇيىندەدى. جەڭىمپازدار مەن جۇلدەگەرلەر كۋبوك, مەدال, ديپلوم, اقشالاي سىيلىقتارمەن ماراپاتتالدى. جالپى جۇلدە قورى 12 350 000 تەڭگەنى قۇرادى. سونىمەن قاتار «ۇزدىك ويىنشى», «ۇزدىك شابۋىلداۋشى», «ۇزدىك بالۋان», «ۇزدىك تۇلپار» اتالىمدارى بويىنشا جۇلدەگەرلەر انىقتالدى. جەڭىمپازدارعا سپورت شەبەرى, جۇلدەگەرلەرگە سپورت شەبەرلىگىنە كانديدات اتاعى بەرىلدى.
الماتى وبلىسى
