فورۋم ۇيىمداستىرۋشىلارىنىڭ مالىمەتىنشە, شەتەلدىك قوناقتار قالانىڭ 37 ءىرى قوناقۇيىنەن بولمەلەرگە تاپسىرىس بەرگەن. 2025 جىلعى 26-31 مامىر ارالىعىندا 4 جۇلدىزدى قوناقۇيلەردىڭ تولىمدىلىعى 50-90% ارالىعىندا بولسا, 5 جۇلدىزدى قوناقۇيلەردە بۇل كورسەتكىش 90-100%-عا جەتكەن.
سالىستىرار بولساق, 2024 جىلدىڭ وسى كەزەڭىندە 4 جۇلدىزدى قوناقۇيلەردىڭ تولىمدىلىعى 30-60%, ال 5 جۇلدىزدىلاردا 50-60% دەڭگەيىندە بولعان.
ورتاشا ەسەپپەن, استاناعا كەلگەن ءبىر ىسكەر ءتۋريستىڭ شىعىنى 177 مىڭ تەڭگەنى قۇرايدى. بۇل سوماعا قوناقۇيدە تۇرۋ, تاماقتانۋ, كولىك قىزمەتتەرى, ويىن-ساۋىق پەن ساۋدا كىرەدى. قوناقتاردىڭ ورتاشا بولۋ ۇزاقتىعى — 3 كۇن.
شەتەلدىك قوناقتاردىڭ كەلۋىنىڭ مۋلتيپليكاتيۆتىك اسەرى 2,6 ملرد تەڭگەدەن اسادى دەپ باعالانۋدا. بۇل ءوز كەزەگىندە مۇنداي حالىقارالىق ءىس-شارالاردىڭ استانا مەن جالپى ەل ەكونوميكاسى ءۇشىن ماڭىزدىلىعىن كورسەتەدى.
Astana International Forum 2025 جىلدىڭ 29-30 مامىرى كۇندەرى وتەدى.
فورۋمنىڭ باس سەرىكتەسى — «سامۇرىق-قازىنا» ۇاق» اق, باس دەمەۋشىسى — «ERG كومەك» كورپوراتيۆتىك قورى, ال رەسمي بانكى — «فريدوم بانك قازاقستان» اق. بۇعان قوسا, فورۋمدى ەلىمىزدىڭ بىرقاتار ءىرى كاسىپورىندارى مەن كومپانيالارى قولداۋدا.
