مينيستر مەديا كەڭىستىكتە, اسىرەسە الەۋمەتتىك جەلىلەردەگى اقپاراتتىق قاۋىپسىزدىكتى قامتاماسىز ەتۋدەگى بىرلەسكەن جۇمىس ءۇشىن العىس ءبىلدىرىپ, كورپوراتسيا باسشىلىعىنان بۇل باعىتتاعى ءىس-شارالاردى كۇشەيتۋدى سۇرادى.
2025 جىلدىڭ باسىنان بەرى قر مادەنيەت جانە اقپارات مينيسترلىگىنىڭ جۇرگىزگەن مونيتورينگ ناتيجەسىندە ەل زاڭناماسىنىڭ 7 689 رەت بۇزىلعانى انىقتالدى. انىقتالعان قۇقىق بۇزۋشىلىقتاردىڭ ىشىندە Facebook جەلىسىنە – 3 027, ال Instagram پلاتفورماسىنا – 4 662 جاعداي تيەسىلى.
سونىمەن قاتار, مينيسترلىكپەن تىعىز ىنتىماقتاستىق ورناتقان Meta كومپانياسى Facebook-تاعى زاڭعا قايشى كونتەنتتىڭ 90%-ىن, ال Instagram-داعى 51%-ىن جويعانى اتاپ ءوتىلدى.
ايدا بالاەۆا ونلاين پلاتفورمالاردا جالعان جارنامانىڭ بەلسەندى تۇردە كوبەيىپ جاتقانىنا ەرەكشە الاڭداۋشىلىق ءبىلدىردى.
«مۇنداي تيزەرلىك جارنامانىڭ دەرەككوزى ناقتى كورسەتىلمەيدى, سوندىقتان وعان دەر كەزىندە دەن قويۋ مۇمكىن بولماي تۇر», دەدى مينيستر.
سونداي-اق, WhatsApp مەسسەندجەرىنە دە جەكە توقتالىپ ءوتتى. بۇگىندە ول دا الاياقتىق جانە جالعان اقپارات تاراتۋ قۇرالىنا اينالىپ وتىر.
ايدا بالاەۆا Meta وكىلدەرىنەن اتالعان ماسەلەلەر بويىنشا تەحنيكالىق شەشىمدەر ۇسىنۋدى جانە پلاتفورمالارداعى كونتەنت مودەراتسياسىن كۇشەيتۋدى سۇرادى. كەزدەسۋ قورىتىندىسى بويىنشا تاراپتار كورسەتىلگەن ماسەلەلەردى شەشۋگە باعىتتالعان ارنايى جۇمىس توبىن قۇرۋعا كەلىستى. قر مادەنيەت جانە اقپارات مينيسترلىگى مەن Meta كومپانياسى قازاقستان اقپاراتتىق كەڭىستىگىنىڭ قاۋىپسىزدىگىن قامتاماسىز ەتۋ ءۇشىن قاجەتتى شارالاردى قابىلدايتىنىن جەتكىزدى.
سونىمەن قاتار, مادەنيەت جانە اقپارات مينيسترلىگى قازاقستاندىقتارعا ينتەرنەتتەگى ساقتىق شارالارىن ساقتاۋ قاجەتتىگىن ەسكەرتەدى. ەش جەرگە جەكە دەرەكتەردى جاريالاماۋعا, اقپارات كوزدەرىن تەكسەرۋگە, سەنىمدى قۇپياسوزدەردى قولدانۋعا, جىبەرىلگەن حابارلامالارعا مۇقيات بولۋعا جانە كۇماندى ارەكەت تۋرالى حابارلاۋعا شاقىرادى.
