شاراپوۆا رەسەي قۇراماسى ساپىندا ويناۋدان باس تارتتى

استانا. 13 اقپان. تەننيسشى ماريا شاراپوۆا فەدەراتسيا كۋبوگى ءۇشىن بولاتىن جارتىلاي فينالدىق كەزدەسۋدە رەسەي قۇراماسى ساپىندا ويناۋدان باس تارتتى. بۇل تۋرالى تاسس حابارلادى. سپورتشى مۇنى ءوزىنىڭ شتۋتگارتتا وتەتىن ايەلدەر تەننيسى اسسوتسياتسياسى (WTA) تۋرنيرىنە قاتىساتىنىمەن بايلانىستىردى. رەسەي تەننيس فەدەراتسياسىنىڭ پرەزيدەنتى شاميل تارپيششەۆ تاسس تىلشىسىنە وسىلاي دەدى. «ول وتكەن جىلى شتۋتگارتتاعى تۋرنيردە جەڭىسكە جەتكەن بولاتىن. سوندىقتان بۇل جولى ءوزىنىڭ جەڭىپ العان ۇپايلارىن قايتا دالەلدەۋى كەرەك. ال بۇل ەكى جارىس ءبىر-بىرىمەن قاتارلاس كەلىپ قالىپ تۇر», - دەپ ءتۇسىندىرجى ول. شاراپوۆا فەدەراتسيا كۋبوگىنىڭ 7-8 اقپان كۇندەرى پولشا قۇراماسىمەن وتكەن شيرەك فينالدىق كەزدەسۋىندە رەسەي كومانداسى ساپىندا ونەر كورسەتكەن ەدى. ول سوندا اپالى-ءسىڭلىلى ۋرسۋلا جانە اگنەشكا رادۆانسالاردى كەزەك-كەزەك ۇتىپ, قۇراما ەكى ۇپاي الىپ بەرىپ, ونىڭ جارتىلاي فينالعا شىعۋىنا كومەكتەسكەن بولاتىن. رەسەيلىكتەر ەندىگى جارتىلاي فينالدىق ماتچتا 18-19 ءساۋىر كۇندەرى نەمىستەرمەن وتكىزەدى. كەلەسى جارتىلاي فينالدىق جۇپتا فرانتسۋز جانە چەح قىزدارى ۇشىراسادى. ايتا كەتەتىن جايت, ماريا شاراپوۆا قاتىسۋعا نيەت ەتىپ قويعان شتۋتگارت ءتۋرنيرى 20 ساۋىردە باستالادى. ال WTA تۋرنيرىندە ونەر كورسەتۋ وعان ۇيىمنىڭ رەيتينگىسىندە امەريكالىق سەرەنا ۋيليامستان كەيىنگى ەكىنشى ورنىن ساقتاپ قالۋ ءۇشىن اۋاداي قاجەت. دامير قوجامقۇل. دەرەك, سۋرەت: تاسس.