كورسەتكىشتىڭ ءوسۋى, قارجىلىق تۇراقتىلىق
«ەلەكتر جەلىلەرىن باسقارۋ جونىندەگى كومپانيا – «KEGOC» اق باسقارما توراعاسى ءنابي ايتجانوۆ كەڭەس مۇشەلەرى مەن شاقىرىلعان ساراپشىلار الدىندا سويلەگەن سوزىندە كومپانيا قىزمەتتىڭ بارلىق نەگىزگى باعىتتارى بويىنشا ايتارلىقتاي ءوسىم كورسەتىپ, العا قاراي قارقىندى جىلجىپ, ەلىمىزدىڭ ەنەرگەتيكالىق ساياساتىنىڭ باسىمدىقتارىنا ساي دامىپ كەلە جاتقانىن اتاپ ءوتتى. نەگىزگى كورسەتكىشتىڭ ءوسۋى, جەلىلىك ينفراقۇرىلىمدى دامىتۋ, تەحنولوگيالىق جاڭارۋ, تۇراقتىلىققا باعىتتالعان جوبالار باستى نازاردا تۇر.
KEGOC 287 000 شاقىرىمعا جۋىق جوعارى كەرنەۋلى ەلەكتر جەلىلەرىن, 832 قوسالقى ستانسانى باسقارادى. كومپانيانىڭ بۇكىل ەل اۋماعىن قامتيتىن 9 وڭىرلىك فيليالى بار. ەلەكتر ەنەرگياسى ارقىلى تاسىمالداۋ, تۇتىنۋ-ءوندىرۋ تەڭگەرىمىن باسقارۋ, ەلەكتر ەنەرگياسىنىڭ تەڭگەرىمسىزدىگىن قارجىلىق رەتتەۋ, ەلەكتر قۋاتىن رەزەرۆتەۋ, جۇيەلىك قىزمەتتەردى ۇيىمداستىرۋ, ەنەرگەتيكالىق جۇيەنىڭ تۇراقتى جۇمىسىن قامتاماسىز ەتۋ سىندى مەملەكەت, قوعام ءۇشىن اسا ماڭىزدى قىزمەت تۇرلەرىمەن تۇراقتى, جۇيەلى شۇعىلدانادى.
2024 جىلى ەلىمىزدە ەلەكتر ەنەرگياسىن تۇتىنۋ 4,3%-عا ارتتى, بۇل وزگەرىس KEGOC قىزمەتى كولەمىنىڭ كەڭەيۋىنە ىقپال ەتتى. ۇلتتىق ەلەكتر تورابى (ۇەت) ارقىلى جەتكىزىلگەن, پايدالانىلعان ەلەكتر ەنەرگياسىنىڭ جالپى كولەمى 93,9 ملرد كۆت ساعاتتى قۇرادى – بۇل 2023 جىلمەن سالىستىرعاندا 30%-عا ارتىق.
قارجىلىق قورىتىندى – تۇراقتىلىقتىڭ تاعى ءبىر دالەلى: كومپانيانىڭ تازا پايداسى 59,5 ملرد تەڭگەگە جەتتى (وتكەن جىلعىعا قاراعاندا +37,1%). 2025 جىلى بۇل كورسەتكىش تاعى 11%-عا ارتادى دەپ كۇتىلىپ وتىر.
سەنىمدىلىكتى قولداۋ, ۇتىمدى پايدالانۋ
باستى مىندەت – ۇەت-تىڭ ۇزدىكسىز جۇمىسىن قامتاماسىز ەتۋ. 2025 جىلى اعىمداعى ءوندىرىس دەڭگەيىن 93,9 ملرد تەڭگە دەڭگەيىندە ۇستاپ تۇرۋ ءۇشىن «KEGOC» اق ەلىمىزدىڭ بىرقاتار وڭىرلەرىندە تۇتىنۋدىڭ ءوسۋى جاعدايىندا, تۇتىنۋشىلاردى ەلەكترمەن سەنىمدى جابدىقتاۋدى قامتاماسىز ەتۋگە قاتىستى شىعارىلاتىن ءونىم كولەمىن ارتتىرۋ ماقساتىندا قۋاتتى اۆتوترانسفورماتورلاردى اۋىستىرۋ شارالارىنا 22,8 ملرد تەڭگە بولەدى.
جەتىقارا, نۇرا, سارىوزەك, ساستوبە نەگىزگى قوسالقى ستانسالارىندا قۋاتتىلىق 860 مۆا-عا ارتادى. 2029 جىلدىڭ سوڭىنا دەيىن 18 نىسانداعى اۆتوترانسفورماتورلاردى اۋىستىرۋ, جاڭعىرتۋ جۇمىسى قۋاتتىلىقتى 1 837 مۆا ارتتىرادى.
ورتا جانە ۇزاق مەرزىمدى كەلەشەكتە «KEGOC» اق ىسكە اسىرىلعان باستامالاردىڭ تيىمدىلىگىن بىرىكتىرۋگە جانە ەنەرگيا جۇيەسىنىڭ تۇراقتى دامۋىن قامتاماسىز ەتۋگە باعىتتالعان بىرقاتار اۋقىمدى ينفراقۇرىلىمدىق جوبالاردى ىسكە اسىرۋدى جوسپارلاپ وتىر.
سەرپىندى جوبالار
- وڭتۇستىك ايماق جەلىسىن كۇشەيتۋ: ۇزىندىعى 475 شاقىرىم بولاتىن 500 كۆ ەلەكتر جەلىسىن سالۋ «سولتۇستىك–وڭتۇستىك» ءترانزيتىنىڭ وتكىزۋ قابىلەتىن 440 مۆت-قا ارتتىرادى. جوبانى ىسكە اسىرۋ مەرزىمى – 2027 جىلدىڭ ورتاسىنا دەيىن.
- باتىس قازاقستاننىڭ ەنەرگيا جۇيەسىن بەج-بەن بىرىكتىرۋ: 500 كۆ (604 كم) جەلى مەن قوسالقى ستانسا سالۋ باتىس ءوڭىرىن قامتاماسىز ەتۋ سەنىمدىلىگىن ارتتىرىپ, ەلىمىزدى ەنەرگەتيكالىق تۇيىقتاۋعا نەگىز بولادى. جوبانىڭ اياقتالۋ مەرزىمى – 2027 جىلدىڭ سوڭى.
- «سولتۇستىك–وڭتۇستىك» تۇراقتى توك جەلىسى: HVDC تەحنولوگياسى بولاشاق گەنەراتسيانى ەسكەرە وتىرىپ, 2000 مۆت-قا دەيىنگى ەلەكتر قۋاتىن جەتكىزۋدى قامتاماسىز ەتەدى. اياقتالۋ مەرزىمى – 2029 جىل.
- استاناداعى 500 كۆ تسيفرلىق قوسالقى ستانسا: ەلوردانى ەلەكترمەن قامتاماسىز ەتۋدىڭ ەكىنشى سىرتقى كوزى جابدىقتاۋدىڭ سەنىمدىلىگىن ارتتىرادى, جاڭارتىلاتىن ەنەرگيا كوزدەرىن (جەك) ينتەگراتسيالاۋعا مۇمكىندىك بەرەدى. ىسكە اسىرۋ مەرزىمى – 2028 جىلعا دەيىن.
- «باتىس–وڭتۇستىك» جوباسى: تۇراقتى توك جەلىسى ەلدىڭ ەنەرگيا جۇيەسىنىڭ بارلىق ايماقتارىن تۇيىقتاي وتىرىپ, باتىس پەن وڭتۇستىك وڭىرلەردى بايلانىستىرادى.
ۇەت-تى دامىتۋعا باسىمدىق
KEGOC الەۋمەتتىك تۇراقتىلىق بويىنشا ءوز پوزيتسيالارىن ساقتاپ, قور توبى كومپانيالارىنىڭ اراسىندا العاشقى ۇشتىكتە تۇر. S&P حالىقارالىق اگەنتتىگىنىڭ ESG رەيتينگى – 55 بالل, ءارى بۇل كورسەتكىش ءوسىپ كەلەدى. كومپانيا جاساندى ينتەللەكت پەن اۆتوماتتاندىرۋدى بەلسەندى ەنگىزىپ جاتىر – ىشكى ۇدەرىستەردىڭ 49%-ى تسيفرلاندىرىلعان. الداعى ماقسات – 2032 جىلى بۇل كورسەتكىشتى 90%-عا جەتكىزۋ.
«ارتىپ كەلە جاتقان ەنەرگيا تۇتىنۋ دەڭگەيى مەن اسىرەسە, جاڭارتىلاتىن گەنەراتسيانىڭ قارقىندى دامۋى جاعدايىندا, جەلىنىڭ سەنىمدىلىگى مەن تەحنولوگيالىق دايىندىعى باستى ورىنعا شىعادى. KEGOC وسى ترانسفورماتسيانىڭ ورتاسىندا تۇر, ەلدىڭ بولاشاق ەنەرگيا جۇيەسىنىڭ نەگىزىن قالاپ جاتىر», – دەدى «سامۇرىق-قازىنا» اق باسقارۋشى ديرەكتورى ەلجاس وتىنشيەۆ.
كەڭەس بارىسىندا ونىڭ مۇشەلەرى مەن ساراپشىلار «KEGOC» اق باسقارما توراعاسى ن.ايتجانوۆقا بىرقاتار سۇراق قويدى. جالپى, كومپانيا جۇمىسىنا وڭ باعا بەرىلدى. قاتىسۋشىلار كومپانيا جوبالارىنىڭ ەل ەنەرگەتيكاسىن دامىتۋدا ماڭىزدى ءرول اتقاراتىنىن اتاپ ءوتىپ, ءوز تاراپتارىنان ۇسىنىستار جاسادى. ونىڭ ىشىندە, وڭىرلەرمەن ءوزارا ءىس-قيمىلدى كۇشەيتۋ, كادر الەۋەتىن دامىتۋ, تسيفرلىق شەشىمدەردى كەڭەيتۋ قاجەتتىگى جونىندە ايتىلدى. KEGOC وكىلدەرى ايتىلعان ۇسىنىستاردى الداعى جۇمىستا ەسكەرۋگە دايىن ەكەندىكتەرىن ءبىلدىردى.
ايتا كەتۋ كەرەك, KEGOC قۇرامدى دامىتۋ, قىزمەتكەرلەردى الەۋمەتتىك قولداۋ باعىتىندا دا كوپ جۇمىس اتقارىپ كەلەدى. مامانداردىڭ بىلىكتىلىگىن ارتتىرۋ باعدارلامالارى, جاڭا جابدىقتارمەن جۇمىس ىستەۋگە ۇيرەتۋ, كاسىبي شەبەرلىك كونكۋرستارى, سپورتپەن اينالىسۋعا جاعداي تۋعىزۋ, جاقسى الەۋمەتتىك پاكەت, قىزمەتكەرلەردىڭ وتباسىلارىنا قامقورلىق جاساۋ, ارداگەرلەر مەن زەينەتكەرلەرگە قۇرمەت, قولداۋ كورسەتۋ – الەۋمەتتىك باعىتتا اتقارىلىپ جاتقان جۇمىستاردىڭ ءبىر پاراسى عانا. بۇل تاراپتاعى جۇمىستار الداعى ۋاقىتتا دا جۇيەلى جالعاسىن تابادى.
قورىتا ايتقاندا, ەلىمىزدىڭ ەنەرگەتيكالىق قاۋىپسىزدىگىن قامتاماسىز ەتەتىن ستراتەگيالىق ماڭىزدى كاسىپورىن – KEGOC كومپانياسىنىڭ جارقىن بولاشاقتا دا زاماناۋي تەحنيكالىق, ەكونوميكالىق, ەكولوگيالىق سىن-قاتەرلەرگە توتەپ بەرە وتىرىپ, بارلىق وزىق ۇلگىلى ستاندارتتارعا ساي, سەنىمدى جۇمىس ىستەي بەرەدى دەۋگە تولىق نەگىز بار.
