ورىس تىلىندە ءبىلىم الاتىن قازاق بالالارىنىڭ سانى ءالى كۇنگە كوپ. مىسالى, پەتروپاۆل قالاسىنداعى 10 538 قازاق بالاسىنىڭ 5 553, ياعني 53 پايىزى وتكەن وقۋ جىلىندا وزگە تىلدە ءبىلىم الدى. ال بالاباقشاداعى 3 690 قازاق بالاسىنىڭ 1 910, ياعني 52 پايىزى ورىس تىلىندە تاربيەلەنىپ جاتىر.
«قازاق ءتىلى» قوعامى وبلىستىق فيليالىنىڭ توراعاسى جانات مۇحامەدجانوۆتىڭ ايتۋىنشا, مەملەكەتتىك تىلدە وقىتاتىن مەكتەپتەرگە باراتىن بالالار سانىن ارتتىرۋ ءۇشىن مەكتەپكە دەيىنگى ۇيىمداردا اتا-انالارىمەن ءتۇسىندىرۋ جۇمىستارىن جۇرگىزۋ قولعا الىنعان. «سونىڭ ناتيجەسىندە جىل سايىن قازاق مەكتەپتەرىنە 1-سىنىپقا باراتىن بالالار سانى ارتىپ كەلەدى. ماسەلەن, 2024–2025 وقۋ جىلىندا 1,4%-عا ءوسىپ, بارلىعى 27,6%-دى قۇرادى. ال 2023–2024 وقۋ جىلىندا ول – 26,2 %,-دى قامتىسا, 2022–2023 وقۋ جىلىندا – 22,9% بولعان ەدى», دەيدى ول.
وبلىس كولەمىندە وسى وقۋ جىلى 23 مامىردا اياقتالدى. بارلىق مەكتەپتە ء«بىلىمىم – وتانىما!» اتتى رەسپۋبليكالىق سىنىپ ساعاتى ءوتتى. ال مەكتەپالدى دايارلىق سىنىپتارىندا ساباق 30 مامىردا ءتامامدالادى.
«سىنىپ ساعاتىنىڭ نەگىزگى ماقساتى – وقۋشىلاردىڭ ۇستازدارىنا دەگەن قۇرمەتىن, ءبىلىم الۋعا دەگەن ۇمتىلىسىن جانە وقۋ جىلىنداعى جەتىستىكتەرىن وبەكتيۆتى باعالاۋ قابىلەتىن قالىپتاستىرۋ. سونىمەن قاتار وسى كۇنى بارلىق ءبىلىم الۋشىلار اراسىندا «تازا قازاقستان», «زاڭ جانە ءتارتىپ», «ادال ازامات» تاقىرىپتارى بويىنشا ەسسە بايقاۋى وتكىزىلدى», دەدى وبلىستىق ءبىلىم باسقارماسىنىڭ باسشىسى ايناگۇل سۇراعانوۆا.
بيىل سولتۇستىك قازاقستان وبلىسى بويىنشا مەكتەپتى «التىن بەلگىمەن» بىتىرۋگە 122 تۇلەك تالاپتانىپ وتىر. بۇل بىلتىرعىعا قاراعاندا 36 وقۋشىعا ارتىق. ولاردىڭ جازباشا جۇمىستارىن وبلىستىق كوميسسيا تەكسەرەدى. سونداي-اق مەكتەپتى «ۇزدىك اتتەستاتپەن» بىتىرۋگە 230 تۇلەك ۇمىتكەر.
ۇلتتىق بىرىڭعاي تەستىلەۋ 16 مامىردا باستالىپ, 4 شىلدەدە اياقتالادى. بىلتىر سولتۇستىكتىڭ تۇلەكتەرى ۇبت بويىنشا 78,3 بالل العان ەدى. بيىل وبلىستا ەكى تەستىلەۋ پۋنكتى دايارلانعان, بىرەۋى – پەتروپاۆل قالاسىندا, ەكىنشىسى – ع.مۇسىرەپوۆ اۋدانىنىڭ ورتالىعىندا. قازىرگى تاڭدا ۇبت-نى وتكىزۋ جونىندەگى مەملەكەتتىك كوميسسيا قۇرىلدى.
سولتۇستىك قازاقستان وبلىسى
