مەملەكەتتىك قىزمەتشىلەرگە جاساندى ينتەللەكت داعدىلارى ۇيرەتىلەدى

باعدارلاما ارقىلى مەملەكەتتىك قىزمەتتىڭ تيىمدىلىگىن ارتتىرۋ ءۇشىن جي قۇرالدارىن جۇمىس ۇدەرىستەرىنە ەنگىزۋ كوزدەلگەن. 

«AI Qyzmet — تسيفرلىق مەملەكەتتىك باسقارۋدى قالىپتاستىرۋ جولىنداعى ماڭىزدى قادام. بۇل باستامانى ىسكە قوسۋ ارقىلى ءبىز مەملەكەتتىك سەكتور قىزمەتكەرلەرىنىڭ جاساندى ينتەللەكت تۋرالى تەك قانا حاباردار بولۋىن ەمەس, ونى كۇندەلىكتى جۇمىسىندا ءتيىمدى قولدانا ءبىلۋىن ماقسات ەتەمىز. بۇل مەملەكەتتىك قىزمەتتەردىڭ ساپاسىن ارتتىرىپ, شەشىم قابىلداۋ ۇدەرىستەرىن جەدەلدەتۋگە مۇمكىندىك بەرەدى. قازاقستان مەملەكەتتىك باسقارۋعا جاساندى ينتەللەكتتى ەنگىزۋدە وڭىردەگى العاشقى ەلدەردىڭ بىرىنە اينالىپ جاتىر», دەدى تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ.

وقىتۋ اياسىندا مەملەكەتتىك قىزمەتكەرلەردىڭ جۇمىسىندا جاساندى ينتەللەكتىنى سانالى تۇردە قولدانۋ داعدىسىن قالىپتاستىرۋ, اكىمشىلىك ۇدەرىستەردى اۆتوماتتاندىرۋ مەن دەرەكتەردى تالداۋ ارقىلى وڭتايلاندىرۋ, سونداي-اق قازاقستانداعى جەرگىلىكتى AI-شەشىمدەرىن (ۇلتتىق جاساندى ينتەللەكت پلاتفورماسى مەن قازاق تىلىندەگى ۇلكەن تىلدىك مودەلدى قوسا العاندا) ەنگىزۋ ارقىلى جۇمىس ونىمدىلىگىن ارتتىرۋ جانە شەشىم قابىلداۋ ساپاسىن جاقسارتۋ جوسپارلانىپ جاتىر. 

كۋرس مەملەكەتتىك قىزمەتكەردىڭ كۇندەلىكتى قىزمەتىندەگى جي-ءدى قولدانۋ, جوسپارلاۋ, اقپاراتتى وڭدەۋ, پرەزەنتاتسيالار جاساۋ, شەشىم قابىلداۋ, تاپسىرمالاردى اۆتوماتتاندىرۋ جانە كوپشىلىك الدىندا ءسوز سويلەۋ سىندى داعدىلاردى مەڭگەرتۋگە باعىتتالادى. بۇل كۋرستا زاماناۋي تىلدىك مودەلدەرمەن جۇمىس ىستەۋدىڭ امبەباپ قاعيدالارى ۇسىنىلادى, ولار جاساندى ينتەللەكتىنىڭ ءارتۇرلى جۇيەلەرىنە وڭاي بەيىمدەلۋگە كومەكتەسەدى. ChatGPT-مەن ءتيىمدى جۇمىس ىستەۋدى مەڭگەرۋ Claude (Anthropic), Gemini (Google), Perplexity, Mistral, Cohere جانە باسقا دا پلاتفورمالاردى سەنىمدى قولدانۋعا جول اشادى.

وقىتۋ وفلاين-فورماتتا مەملەكەتتىك باسقارۋ اكادەمياسى مەن ونىڭ فيليالدارىنىڭ بازاسىندا وتەدى. Mastercard جانە KPMG كاۆكاز جانە ورتالىق ازيا كومپانيالارى كۋرستى ۇيىمداستىرۋعا قولداۋ كورسەتىپ وتىر. وقىتۋ اياقتالعاننان كەيىن مەملەكەتتىك قىزمەتشىلەرگە بىرەگەي ءنومىرى بار سەرتيفيكاتتار تابىستالادى.

باعدارلاما اياسىندا جىل سايىن شامامەن 30 000 مەملەكەتتىك قىزمەتكەردى قامتۋ جوسپارلانعان. كۋرستىڭ جازباسى ەلىمىزدەگى بارلىق مەملەكەتتىك قىزمەتكەرلەر ءۇشىن Astana Hub پلاتفورماسىندا كەز كەلگەن ۋاقىتتا قولجەتىمدى بولادى.