جاعىمدى جاڭالىق وڭىرلىك كوممۋنيكاتسيالار قىزمەتىندە ۇلىتاۋ وبلىسى ءبىلىم باسقارماسى مەن سانيتاريالىق-ەپيدەميولوگيالىق باقىلاۋ دەپارتامەنتىنىڭ وكىلدەرىمەن بولعان بريفينگتە ايتىلدى.
ۇلىتاۋ وبلىسىندا 2025 جىلعى جازعى دەمالىس ماۋسىمىندا 36 مىڭنان استام وقۋشىنى ءتۇرلى باعىتتاعى ساۋىقتىرۋ باعدارلامالارىمەن قامتۋ جوسپارلانىپ وتىر.
وبلىس بويىنشا بارلىعى 153 لاگەر مەن دەمالىس الاڭى جۇمىس ىستەيدى. ونىڭ ىشىندە 59 مەكتەپ جانىنداعى لاگەردە 4 809 بالا تەگىن دەمالادى. وسى ماقساتقا 73,7 ملن تەڭگە بيۋدجەت قاراجاتى بولىنگەن. جالپى, جازعى ماۋسىمدى ۇيىمداستىرۋعا بيۋدجەتتەن جانە دەمەۋشىلەردەن 515 ملن تەڭگە باعىتتالدى.
سونىمەن قاتار, وبلىس اكىمدىگى جەزقازعان قالاسىنداعى بوتانيكالىق باق ماڭىنان 400 ورىندىق جاڭا لاگەر سالۋدى جوسپارلاپ وتىر. قازىرگى ۋاقىتتا 28,8 ملن تەڭگەگە جوبالىق-سمەتالىق قۇجاتتاما ازىرلەنىپ, مەملەكەتتىك ساراپتاماعا جىبەرىلدى.
بالالار دەمالىسى بارىسىندا قاۋىپسىزدىك پەن سانيتارلىق تالاپتاردى ساقتاۋ – باستى نازاردا. ساۋىقتىرۋ ورىندارى ارنايى تەكسەرىستەن وتكىزىلىپ, پەرسونال مەديتسينالىق تەكسەرۋدەن وتەدى. بالالار تەك مەديتسينالىق انىقتامامەن قابىلدانادى.
سونداي-اق, شومىلۋ ەرەجەلەرىن ءتۇسىندىرۋ, ءسۋيتسيدتىڭ الدىن الۋ, قۇقىقتىق جانە پسيحولوگيالىق قاۋىپسىزدىك بويىنشا ارنايى ساباقتار وتكىزۋ جوسپاردا بار.
29 مامىردا وبلىس اۋماعىندا «قاۋىپسىز بالالىق شاق!» اتتى كەڭ اۋقىمدى اقپاراتتىق اكتسيا وتەدى.
ۇلىتاۋ وبلىسى
