اعىمداعى جىلدىڭ العاشقى ءتورت ايىندا ءوندىرىس كولەمى 45 628 بىرلىكتى قۇرادى – بۇل وتكەن جىلدىڭ سايكەس كەزەڭىمەن سالىستىرعاندا (22 583 بىرلىك) ەكى ەسەگە جۋىق ارتىق. قازىردە ەلىمىزدە اۆتوكولىك وندىرەتىن سەگىز ءىرى كاسىپورىن: قوستاناي قالاسىنداعى «سارىارقااۆتوپروم» جشس (Allur), ساران قالاسىنداعى «QazTehna» جشس, الماتى قالاسىنداعى «Hyundai Trans Kazakhstan» جشس جانە «Hyundai Trans Auto» جشس, سەمەي قالاسىنداعى «سەماز» جشس جانە «Daewoo Bus Kazakhstan» جشس, كوكشەتاۋ قالاسىنداعى «كاماز-ينجينيرينگ» اق, جانە ورال قالاسىنداعى «ۋرالسكاگرورەمماش» اق جۇمىس ىستەيدى.
سالادا اۆتوكومپونەنتتىك بازاعا ەرەكشە كوڭىل بولىنۋدە. وتكەن جىلى ساران قالاسىندا Tengri Tyres شينا زاۋىتى, الماتىدا Kazakhstan Mobility Engineering زاۋىتى (مۋلتيمەديالىق جۇيەلەر ءوندىرىسى) جانە Almaty Autoparts Production زاۋىتى (اۆتوورىندىقتار ءوندىرىسى) ىسكە قوسىلدى. «QazTehna» جشس شاناق بولشەكتەرىن شتامپتايتىن جابدىقتى جەتكىزۋگە كەلىسىمشارت جاساسا, «Qarmet» اق بازاسىندا اۆتوكولىك بولاتىن شىعارۋ جوسپارلانىپ وتىر. بۇل جوبالار جۇزدەگەن جاڭا جۇمىس ورنىن اشۋعا مۇمكىندىك بەرىپ, سالانىڭ تەحنولوگيالىق الەۋەتىن ارتتىرماق.
سول سەكىلدى قازىرگى ساتتە جەتىسۋ وبلىسىنداعى «قاينار-اكب» جشس شىعارعان اككۋمۋلياتورلار بەلسەندى قولدانىلىپ, Hyundai قۇراستىرۋ جەلىلەرىندە سىناقتان ءوتىپ جاتىر, ال بولاشاقتا Kia كولىكتەرىنە دە قولدانىلۋى مۇمكىن. «سارىارقااۆتوپروم» زاۋىتىندا وتاندىق كومپونەنتتەر – «ۆەكتور پاۆلودار» جشس وندىرگەن قۇيما ديسكىلەر مەن Tengri Tyres شينالارى ءساتتى قولدانىلۋدا. سونىمەن قاتار Hyundai Trans Kazakhstan جانە Allur وندىرىستىك جەلىلەرى جاڭعىرتىلىپ, روبوتتاندىرىلعان جۇيەلەر ەنگىزىلدى, دانەكەرلەۋ, سىرلاۋ جانە قۇراستىرۋ ۋچاسكەلەرى جاڭارتىلدى.
وقشاۋلاۋ دەڭگەيىن ارتتىرۋ ماقساتىندا «سارىارقااۆتوپروم» ەكى ءىرى اۆتوكومپونەنتتىك ءوندىرىس ورتالىعىن قۇرۋ جوباسىن ىسكە اسىرىپ جاتىر. «Tehnopark.kz» جشس بازاسىنداعى 1-ءشى لوكاليزاتسيالاۋ ورتالىعى جالپى 30 000 شارشى مەتر اۋماقتى قامتىسا, «ProProduction» جشس بازاسىنداعى 2-ءشى لوكاليزاتسيالاۋ ورتالىعى 25 000 شارشى مەترگە ورىن تەپكەن. بۇل وندىرىستىك الاڭداردا ينتەرەر مەن ەكستەرەرگە ارنالعان پلاستيكالىق بولشەكتەر, سالوننىڭ ىشكى ساندىك ارلەۋى, دىبىس وشىرگىش, ەلەكتر سىمدارى, ورىندىقتار, گەرمەتيك, ماستيكا جانە شىعارۋ جۇيەلەرى وندىرىلەتىن بولادى. ورتالىقتاردىڭ ىسكە قوسىلۋى يمپورتقا تاۋەلدىلىكتى ازايتىپ, قازاقستاننىڭ اۆتوكولىك ونەركاسىبىندەگى پوزيتسياسىن نىعايتۋعا سەپتىگىن تيگىزەدى.
مەملەكەت سالا دامۋىن نورماتيۆتىك-قۇقىقتىق بازانى جەتىلدىرۋ, تاريفتىك جانە بەيتاريفتىك ىنتالاندىرۋ شارالارىن ەنگىزۋ, سونداي-اق كووپەراتسيالىق بايلانىستاردى نىعايتۋ باعىتىنداعى جۇيەلى جۇمىستارمەن ۇدايى قولداپ وتىر. 2010-2020 جىلدارى جۇزەگە اسقان ونەركاسىپتىك جيناقتاۋ تۋرالى كەلىسىمدەر اياسىندا قازاقستاندىق اۆتوزاۋىتتار دانەكەرلەۋ مەن سىرلاۋ پروتسەستەرىن جولعا قويىپ, جوعارى دەڭگەيدەگى لوكاليزاتسيانى جانە سالانىڭ تەحنولوگيالىق جەتىلۋىن كورسەتتى.
