پاۆلودار. 13 اقپان. پاۆلودار وبلىسى كاسىپورىندارىنىڭ ەڭبەك جاعدايىن جاقسارتۋعا وراي جۇمىس توبى قۇرىلدى. بۇل تۋرالى egemen.kz ءتىلشىسى حابارلادى.
وبلىستىق يندۋستريالدى-يننوۆاتسيالىق دامۋ باسقارماسىنىڭ مالىمەتىنشە, جۇمىس توبىنىڭ قۇرامىندا اقسۋ, ەكىباستۇز, پاۆلودار قالالارىنىڭ اكىمدىگى, باسقارمالار مەن دەپارتامەنتتەر باسشىلارى بار. ماقساتى – ءوندىرىس ورىندارىنىڭ جۇمىسىن توقتاتپاۋ, جۇمىس ورىندارىن ساقتاۋ.
العاشقى وتىرىستا وبلىستاعى جەتى كاسىپورىن باسشىلارىنىڭ بۇيىمتايلارى تىڭدالدى. مىسالى, «مايقايىڭالتىن» اق-تىڭ باس ديرەكتورى يگور بوگاچەۆ كەن ءوندىرىسىنىڭ كولەمى 387 895 توننا, ال وڭدەلگەن رۋدانىڭ كولەمى 397 176,7 توننا بولعانىن جەتكىزدى. بيىل كەن ءوندىرىسىنىڭ كورسەتكىشىن 229 000 تونناعا جەتكىزۋ جوسپارلانۋدا. ي. بوگاچەۆ ەكىباستۇز-مايقايىڭ سۋ قۇبىرىن ىسكە قوسۋ قاجەتتىگىن ايتتى.
ال ەكىباستۇزدىڭ تورتقۇدىق التىن فابريكاسىنىڭ مەنشىك يەسى بولىپ تابىلاتىن «الگولد» جشس-نا №2 ەلەكتر ستانساسى جەلىسى مەن سۋ قۇبىرىن سالۋ بويىنشا كومەك كورسەتىلەدى. ءوندىرىس بيىل ىسكە قوسىلماق. سونىمەن بىرگە, «پاۆلودار قۇبىر-پروكات زاۋىتى» جشس-نا شيكىزاتتى «ارسەلور ميتتال تەمىرتاۋ» اق-تان ساتىپ الۋعا قولداۋ جاسالادى. ال «تەحنولوگيالىق لينيالار» جشس-نا ەلەكتر ەنەرگياسى قۋاتتىلىعىنىڭ جوقتىعىنا قاتىستى جانە «بيزنەستىڭ جول كارتاسى-2020» باعدارلاماسى شەڭبەرىندە كومەك كورسەتىلەدى. بۇدان باسقا تاعى دا ءتورت وندىرىسكە قولداۋ جاساۋ وتاندىق تاۋار وندىرۋشىلەر ەڭبەك ەتىپ جۇرگەن جۇمىس ورىندارىن ساقتاپ قالۋعا مۇمكىندىك بەرەدى.
فاريدا بىقاي.
دەرەك, سۋرەت: egemen.kz.
