ءىس-شاراعا 250-گە جۋىق ورتالىق مەملەكەتتىك ورگاندار مەن وعان قاراستى ۇيىمداردىڭ, جەرگىلىكتى اتقارۋشى ورگاننىڭ, كۆازيمەملەكەتتىك سەكتورداعى كومپانيالاردىڭ قىزمەتكەرلەرى, سونداي-اق پرەزيدەنتتىك جاستار كادر رەزەرۆىنىڭ مۇشەلەرى قاتىستى.
جيىن شىمىلدىعىن مەملەكەتتىك قىزمەت ىستەرى اگەنتتىگىنىڭ توراعاسى دارحان جازىقباي اشىپ, پرەزيدەنتتىك جاستار كادر رەزەرۆى جونىندە اڭگىمەلەپ, اگەنتتىكتىڭ الداعى جوسپارلارىمەن تانىستىردى.
«مەملەكەت باسشىسى قاسىم-جومارت توقاەۆ 2019 جىلى پرەزيدەنتتىك جاستار كادر رەزەرۆىن جاساقتاۋ قاجەتتىگى تۋرالى باستاما كوتەرىپ, وسى تاپسىرمانى ءبىزدىڭ اگەنتتىككە جۇكتەگەن ەدى. سودان بەرى اگەنتتىك اتالعان جوبانى تابىستى جۇزەگە اسىرىپ كەلەدى. ءبىز بۇل باستاما اياسىندا جاستاردى مەملەكەتتىك باسقارۋ جۇيەسىنە بەلسەندى تۇردە تارتۋعا, ولاردىڭ مەملەكەتتىك قىزمەتتەگى ۇلەسىن ارتتىرۋعا مۇمكىندىك الىپ وتىرمىز», دەدى ول.
سونداي-اق سپيكەر 1 ماۋسىمنان باستاپ, جاستار كادر رەزەرۆىنىڭ جاڭا ىرىكتەۋ كەزەڭى باستالاتىنىن, ول سىندا جاسى 35-تەن اسپاعان, جوعارى ءبىلىمى مەن كەمى 5 جىلدىق جۇمىس ءوتىلى بار, مەملەكەتتىك ءتىلدى ۆ دەڭگەيىنەن تومەن ەمەس مەڭگەرگەن كەز كەلگەن ەل ازاماتتارى باق سىناي الاتىنىن ايتا كەلىپ, بۇگىنگى كەزدەسۋدىڭ باستى ماقساتى جاستارعا وسى جوبا تۋرالى جان-جاقتى مالىمەت بەرۋگە باعىتتالىپ وتىرعانىن جەتكىزدى. اگەنتتىك باسشىسى الداعى ۋاقىتتا ايماقتاردا دا وسىنداي كەزدەسۋلەر ۇيىمداستىرىلاتىنىن تىلگە تيەك ەتتى.
اگەنتتىك توراعاسى ىرىكتەۋدىڭ 2025 جىلدىڭ ماۋسىم-قازان ايلارى ارالىعىندا وتەتىنىن, سىن بىرنەشە كەزەڭنەن تۇراتىنىن, ناتيجەسىندە رەزەرۆكە ۇزدىك 50 كانديدات ىرىكتەلىپ, رەزەرۆشىلەر 3 جىل ىشىندە كونكۋرستىق ىرىكتەۋدەن وتپەي تىكەلەي ءتۇرلى مەملەكەتتىك لاۋازىمدارعا تاعايىندالۋى مۇمكىن ەكەنىن جەتكىزدى. سونداي-اق د.جازىقباەۆ قاتىسۋشىلاردى بيىل التى سالالىق باعىت بويىنشا باقتارىن سىناۋعا شاقىردى: ينفراقۇرىلىمدى, ونەركاسىپتى دامىتۋ جانە ساۋدا ساياساتى, اگروونەركاسىپتىك كەشەن جانە قورشاعان ورتانى قورعاۋ, سىرتقى ساياسات جانە ينۆەستيتسيالار, ەكونوميكالىق جانە قارجىلىق ساياسات, تسيفرلاندىرۋ, الەۋمەتتىك ساياسات جانە ازاماتتىق قوعام.
«ەلىمىزدىڭ دامۋىنا ۇلەس قوسا الاتىن ءبىلىمدى, بىلىكتى, بەلسەندى جاستارعا مەملەكەتتىك قىزمەتتىڭ ەسىگى ءاردايىم اشىق بولۋعا ءتيىس. پرەزيدەنتتىك جاستار كادر رەزەرۆى – ۇلكەن مۇمكىندىك. قازىرگى تاڭدا رەزەرۆ قۇرامىندا 400-گە جۋىق جاس بار, ولاردىڭ 318-ءى تۇراقتى جۇمىسقا ورنالاسىپ, كەيبىرى قىزمەتتە ءوسىپ, جاۋاپتى لاۋازىمدارعا تاعايىندالدى», دەدى اگەنتتىك توراعاسى.
پرەزيدەنتتىك جاستار كادر رەزەرۆى ارقىلى تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىنە قاراستى جاساندى ينتەللەكت جانە يننوۆاتسيالاردى دامىتۋ كوميتەتىنىڭ توراعاسى بولىپ تاعايىندالعان عيززات بايتۇرسىنوۆ پرەزيدەنتتىك جاستار كادر رەزەرۆى – جاستاردىڭ قىزمەتتىك وسۋىنە داڭعىل جول اشىپ وتىرعانىن ايتادى.
«پرەزيدەنتتىك جاستار كادر رەزەرۆىن جاس مامانداردىڭ وزدەرىن جان-جاقتى كورسەتۋىنە, ءبىلىمى مەن الەۋەتىن پايدالانىپ, مەملەكەتتىك قىزمەت پەن كۆازيمەملەكەتتىك سەكتوردا جاۋاپتى لاۋازىمدارعا كوتەرىلۋىنە جول اشاتىن الەۋمەتتىك ليفت دەۋگە بولادى. جوبا – زاماناۋي ءارى بولاشاعى زور, ەلىمىزدىڭ كادر ساياساتىنا سەرپىن بەرەتىن اۋقىمدى باستاما», دەدى ول.
عيززات سەيداحمەت ۇلى پرەزيدەنتتىك جاستار كادر رەزەرۆىنە كىرۋ جولىنداعى جەكە تاجىريبەسىمەن ءبولىسىپ, مەملەكەتتىك قىزمەتكە 2020 جىلى شتاتتان تىس قىزمەتكەر بولىپ كەلگەنىن, بار بولعانى ءتورت جىل ىشىندە باسقارۋشى قىزمەتكە دەيىن كوتەرىلگەنىن, مۇنداي ناتيجەگە جەتۋىنە پرەزيدەنتتىك جاستار كادر رەزەرۆى مۇمكىندىك تۋعىزعانىن اڭگىمەلەدى.
ال پرەزيدەنتتىك جاستار كادر رەزەرۆىنىڭ مۇشەسى رەتىندە حالىقارالىق باعدارلامالار ورتالىعىنىڭ باسقارما توراعاسى بولىپ قىزمەتكە كەلگەن ءادىل قۇسمانوۆ: «مەن – قازىر حالىقارالىق باعدارلامالار ورتالىعىنىڭ باسقارما توراعاسىمىن. بۇل مەكەمە «بولاشاق» حالىقارالىق ستيپەنديالىق باعدارلاماسىنىڭ جۇمىستارىن ۇيلەستىرەدى. ءبىزدىڭ باستى ماقساتىمىز – شەتەلدىڭ مىقتى وقۋ ورىندارىنا ءبىلىمدى ستۋدەنتتەردى جىبەرىپ, ەلىمىزدىڭ ەكونوميكاسىنا قاجەتتى مامانداردى دايارلاۋ. جىل سايىن الەمنىڭ ۇزدىك ۋنيۆەرسيتەتتەرىنە كەمىندە 600 ازاماتتى وقۋعا جىبەرەمىز. قازىرگى تاڭدا ورتالىق اياسىندا ترانسفورماتسيا كەزەڭى ءجۇرىپ جاتىر. قازاقستاننىڭ دامۋى ءۇشىن ەڭ قاجەتتى جانە سۇرانىسقا يە ماماندىقتارعا باسىمدىق بەرۋدىڭ تەتىكتەرىن ەنگىزۋگە اتسالىسىپ جاتىرمىز. مىسالى, بيىلدان باستاپ اتوم ەنەرگەتيكاسى سالاسىنا باعىتتالعان ماماندىقتارعا باسىمدىق بەرۋ ويىمىزدا بار», دەدى.
رەسمي دەرەكتەرگە سۇيەنسەك, 2019, 2021 جانە 2023 جىلدارى پرەزيدەنتتىك جاستار كادر رەزەرۆىنە جالپى 60 مىڭنان اسا ازامات قىزىعۋشىلىق تانىتقان. ىرىكتەۋلەر قورىتىندىسى بويىنشا رەزەرۆكە 400 ادام قابىلدانىپ, بۇگىندە ولاردىڭ 318-ءى جاۋاپتى قىزمەتتەرگە تاعايىندالىپتى. رەزەرۆشىلەردىڭ 167-ءى – ورتالىق مەملەكەتتىك ورگانداردا, 37-ءى – جەرگىلىكتى اتقارۋشى ورگانداردا, 62-ءى – ۇلتتىق كومپانيالاردا, 52-ءى وزگە ۇيىمداردا قىزمەت ەتىپ جاتىر. سونداي-اق 39 رەزەرۆشى – ساياسي, ۇشەۋى «ا» كورپۋسىنىڭ لاۋازىمدارىنا تاعايىندالعان. ال ەكى رەزەرۆشى ءماجىلىس دەپۋتاتى, بىرەۋى ءماسليحات دەپۋتاتى بولىپ سايلانعان.
