فوتو:pixabay.com
الماتى قالاسىنىڭ جاستار ساياساتى باسقارماسى جاستار اراسىنداعى جۇمىسسىزدىقتى ازايتۋ, ۋاقىتشا جانە تۇراقتى جۇمىسقا ورنالاستىرۋ, تاجىريبەدەن وتكىزۋ, كاسىپتىك وقىتۋ جانە مانساپتىق باعىت-باعدار بەرۋ ماقساتىندا بىرقاتار جوبانى جۇزەگە اسىرىپ كەلەدى.
بۇل باعىتتاعى نەگىزگى قۇرالداردىڭ ءبىرى – Jasalmaty.kz اقپاراتتىق پورتالى. وندا «Jobfair365» جۇمىسقا ورنالاستىرۋ سەرۆيسى جانە «SkillBridge» ونلاين وقىتۋ مەن بىلىكتىلىكتى ارتتىرۋ پلاتفورماسى جۇمىس ىستەيدى. مىسالى, بۇل پلاتفورماعا 25 مىڭنان استام بىرەگەي قولدانۋشى تىركەلگەن, 5 مىڭنان استام جۇمىس بەرۋشى 7 مىڭنان استام بوس جۇمىس ورنىن جاريالاعان. سونىڭ ارقاسىندا جىل باسىنان بەرى 3,5 مىڭ جاس تۇراقتى جۇمىس تاپقان.
جاستاردى جۇمىسقا ورنالاستىرۋدا كەشەندى جۇمىس جۇرگىزىپ جاتقان جوبالاردىڭ ءبىرى – قالالىق مانساپ ورتالىعى. بۇعان دەيىن ءاربىر وقۋ ورنىندا جەكە مانساپ ورتالىقتارى بولسا, قازىرگى تاڭدا بۇل جۇيە جۇمىس بەرۋشىلەرمەن, ەڭبەك ۇتقىرلىعى ورتالىقتارىمەن جانە باسقا قۇرىلىمدارمەن بىرىكتىرىلگەن ورتاق پلاتفورمادا جۇمىس ىستەيدى.
بيىل جىل باسىنان بەرى قالالىق مانساپ ورتالىعىنا 7,5 مىڭ جاس جۇگىنگەن بولسا, ولاردىڭ 5,7 مىڭى جۇمىسقا ورنالاسقان. جالپى العاندا جىلدىڭ باسىنان بەرى الماتىدا 9,2 مىڭنان استام جاس تۇراقتى جۇمىسقا ورنالاسقان.
«بىرنەشە اي جۇمىس ىزدەدىم. مانساپ ورتالىعىندا ماماندار باعىتىمدى انىقتاپ, تۇيىندەمەمدى دۇرىس جاساۋعا كومەكتەستى. سونىڭ ارقاسىندا ماماندىعىم بويىنشا جۇمىسقا ورنالاستىم. قازىر وقۋ مەن جۇمىستى قاتار جالعاستىرىپ جاتىرمىن», دەيدى قالا تۇرعىنى الديار نۇرىموۆ.
جۇمىس ىزدەپ جۇرگەن جاستارعا قۇلاققاعىس, قالالىق مانساپ ورتالىعىنىڭ قىزمەتىن قالاداعى كەز كەلگەن كوميۋنيتي-ورتالىقتان الۋعا بولادى.
