ءىس-شارا جاۋىنگەرلىك تۋدىڭ شىعارىلۋى جانە مەملەكەتتىك ءانۇراننىڭ ورىندالۋىمەن اشىلدى.
«بۇگىن – ءبىز ءۇشىن ەرەكشە كۇن. وڭىرلىك قولباسشىلىقتىڭ اسكەري بولىمدەرىندە انت قابىلداۋ ءراسىمى ءوتىپ جاتىر. بۇل – قارۋلى كۇشتەرگە قابىلدانعان ءاربىر ازاماتتىڭ قاسيەتتى سەرتى. بۇل كۇن سىزدەردىڭ جادىلارىڭىزدا ماڭگى ساقتالادى دەپ سەنەمىن. بارشاڭىزعا مىقتى دەنساۋلىق, وتباسىلارىڭىزعا اماندىق, اسكەري قىزمەتتە ساتتىلىك تىلەيمىن», دەدى «باتىس» وڭىرلىك قولباسشىلىعى اسكەرلەرىنىڭ قولباسشىسى گەنەرال-مايور باۋىرجان ارتىقوۆ.
انت قابىلداعاننان كەيىن ساربازدار قىزمەتتىڭ كەلەسى كەزەڭىنە – كىشى مامانداردى دايارلاۋ باعدارلاماسىمەن قارقىندى جاۋىنگەرلىك وقۋعا كىرىسەدى. التى ايدان سوڭ ولار ارتيللەريست, تانكيست, بايلانىسشى, اتقىش سىندى اسكەري ماماندىقتاردى مەڭگەرىپ, تاجىريبەلى جاۋىنگەرلەر قاتارىنا قوسىلادى. جاس ساربازدار ەلىمىزدىڭ توعىز وڭىرىنەن شاقىرتىلعان.
اتا-انالاردىڭ ۇلدارىمەن كەزدەسۋى ەرەكشە اسەرلى بولدى. جاس ساربازدىڭ اناسى فاريدا جانوۆا ءوز قۋانىشىمەن ءبولىستى:
«مەن ورالدان كەلدىم, ۇلىمدى قاتتى ساعىندىم, ءبىر اي كورمەدىك. ول ەسەيىپ, شىمىر بولىپتى. كومانديرلەرگە ۇلكەن العىس ايتامىن. بالالارىمىز انتىنا ادال بولىپ, قىزمەتتەرىن ابىرويمەن اتقارسىن», دەدى ول.
رەسمي ءبولىم اياقتالعان سوڭ, جاس ساربازدار ساپتىق دايىندىق, قويان-قولتىق ۇرىستان, كوزدى جۇمىپ اۆتوماتتى بولشەكتەپ-جيناۋدان ماشىقتارىن كورسەتتى. بارلاۋ بولىمشەلەرى تۇتقىنداردى بوساتۋ, قارۋ قولدانۋ جانە جاقىن ۇرىستاعى شەبەرلىكتەرىن پاش ەتتى.
قوناقتارعا اسكەري تەحنيكا مەن قارۋ-جاراق كورمەسى ۇيىمداستىرىلىپ, اسكەري ءبولىم كومانديرلەرىمەن كەزدەسۋ ءوتتى. ءىس-شارا سوڭىندا ساربازدار العاشقى سەيىلدەمەلەرىن الىپ, ونى جاقىندارىمەن بىرگە وتكىزدى.
ماڭعىستاۋ وبلىسى
