- بولگاريانىڭ پاناگيۋريش قالاسىندا ۇستەل تەننيسىنەن WTT «Youth Contender» ءتۋرنيرى اياقتالدى. 13 جاسقا دەيىنگى قىزدار اراسىنداعى سايىستا ءجانيا بەكمۇحامبەتوۆا باس جۇلدەنى ولجالادى. جارىس بارىسىندا جاس سپورتشى بولگاريالىق رادينا زاحاريەۆا, مارتينا نيكولوۆا, بەلوسلاۆا بالكانسكايا, سلوۆاكيالىق ۆيۆەن مۋركوۆا, رۋمىنيالىق كاريسس سەربان مەن بيانكا تومۋدى ۇتتى. ەندى ءجانيادان بولەك, ارتيوم ۆاپلەت, داگير دانياروۆ, ءامىر سارقىتباي سىندى جاس ورەندەر يسپانيانىڭ پلادجا-دە-اروسىندا جالاۋى جەلبىرەيتىن جارىستا باق سىنايدى.
- اقش-تىڭ لوس-اندجەلەس قالاسىنداعى «Industry Hills Expo Center»-دە «International Taekwondo Fest 2025» دەپ اتالاتىن حالىقارالىق تۋرنير اياقتالدى. تورتكۇل دۇنيەنىڭ ءار قيىرىنان جينالعان 300-دەن اسا تاەكۆوندوشى قاتىسقان جارىستا ادىلەت بازارباەۆتىڭ باعى جاندى. 63 كگ سالماق دارەجەسىندە كۇش سىناسقان ول تاحا حوزەما حامباتي, ستەنلي لوپەس, الدەن ريۋ سىندى شەبەرلەردى ايقىن باسىمدىقپەن ۇتىپ, باس جۇلدەنى قانجىعاسىنا بايلادى.
- اقتوبەدە تاەكۆوندودان (WT) ەل كۋبوگىنىڭ ءبىرىنشى كەزەڭى ءوز مارەسىنە جەتتى. كوماندالىق ەسەپتە الماتى قالاسى وزىپ, 3 التىن, 2 كۇمىس, 4 قولانى ولجالادى. ەكىنشى, ءۇشىنشى ورىنداردى اتىراۋ (2 التىن) مەن تۇركىستان وبلىسى (1 التىن, 2 كۇمىس, 2 قولا) يەلەندى.
- تۋريندەگى تۋرنيردە توپ جارعاننان كەيىن ەلىمىزدىڭ تەننيسشىسى الەكساندر بۋبليك اتر رەيتينگىندە بىردەن 25 ساتىعا جوعارىلاپ, 51-ورىنعا تابان تىرەدى. الەكساندر شەۆچەنكو 97-ورىندا. ەرلەر اراسىندا ءالى دە يتاليالىق ياننيك سيننەر كوش باستاپ تۇر. ەكىنشى, ءۇشىنشى ورىنداردا – يسپانيالىق كارلوس الكاراس پەن گەرمانيالىق الەكساندر زۆەرەۆ. WTA رەيتينگىندە بەلارۋستىك ارينا سوبولەنكو الدىنا جان سالار ەمەس. ونى اقش-تىڭ قوس وكىلى كوري گاۋفف پەن دجەسسيكا پەگۋلا وكشەلەپ كەلەدى. ەلىمىزدىڭ ەڭ ۇزدىك ويىنشىسى ەلەنا رىباكينا 12-ورىندا, ەكىنشى راكەتكا يۋليا پۋتينتسەۆا 32-ساتىعا جايعاستى. سونداي-اق جاپونياداعى جەڭىسىنەن كەيىن زارينا دياستىڭ دا جاعدايى ءبىرشاما جاقساردى. جەرلەسىمىز 43 ساتىعا جوعارىلاپ, بۇل كۇندەرى 275-ورىندا تۇر.
- فرانتسيانىڭ ستراسبۋرگىندەگى ءتۋرنيردى ەكىنشى كەزەڭنەن باستاعان ەلىمىزدىڭ ءبىرىنشى راكەتكاسى ەلەنا رىباكينا قىتايلىق ۆان ءسينيۋيدى 6:1, 6:3 ەسەبىمەن ويسىراتا ۇتتى. ءۇشىنشى اينالىمدا پولشالىق ماگدا لينەتپەن شەبەرلىك بايقاسادى. جارىستىڭ جۇلدە قورى 925 661 ەۋرونى قۇرايدى.
