كوللاجدى جاساعان – قونىسباي شەجىمباي, «EQ»
عالىمدار بۇل سەزىمدى عىلىم تىلىمەن تۇسىندىرۋگە تىرىسىپ كەلەدى. ولار نوستالگيا ادامداردى ءبىر-بىرىمەن جالعايتىن كورىنبەيتىن ءجىپ دەيدى. جۋىردا ونىڭ ادام ومىرىندەگى الەۋمەتتىك ماڭىزىن تەرەڭنەن اشىپ كورسەتكەن ءۇش ىرگەلى زەرتتەۋ جاريالاندى. العاشقىسى – امەريكاداعى بۋففالو ۋنيۆەرسيتەتىندە جۇرگىزىلگەن. زەرتتەۋشىلەر 449 ستۋدەنت پەن 396 ءارتۇرلى جاستاعى ادام اراسىندا ساۋالناما وتكىزىپ, ولاردىڭ نوستالگياعا بەيىمدىلىگىن, ياعني وتكەنگە قانشالىقتى ءجيى ورالاتىنىن, سول ەستەلىكتەردەن قانشالىقتى اسەر الاتىنىن انىقتاعان. سونىمەن قاتار قاتىسۋشىلاردان ولاردىڭ جاقىن دوستارى, وتباسى, الەۋمەتتىك ورتاسى تۋرالى سۇرالعان. ناتيجەسىندە, نوستالگياعا بەيىم ادامدار دوسى كوپ جاندار بولىپ شىققان. ساعىنىش ولار ءۇشىن تەك ەستەلىك ەمەس – دوستىقتى ساقتاپ قالۋعا يتەرمەلەيتىن ىشكى قوزعالىس. بۇل بايلام ەكىنشى زەرتتەۋدە دە دالەلدەنگەن. عالىمدار ادامدا ەكى ءتۇرلى الەۋمەتتىك قۇلشىنىس بولاتىنىن انىقتاعان: ءبىرى – جاڭا ادامدارمەن تانىسۋعا ۇمتىلۋ, ەكىنشىسى – بۇرىنعى دوستىقتى ساقتاپ قالۋعا تالپىنۋ. ال نوستالگياسى جوعارى ادامداردا ەكىنشى باعىت باسىم ەكەن. ولار الىستاپ كەتكەن ادامدارمەن قايتا بايلانىسۋعا, بىرگە وتكىزگەن ساتتەردى تىرىلتۋگە قادام جاساپ, ۋاقىتپەن سىنالعان سىيلاستىقتى بەكەمدەي تۇسەدى.
ءۇشىنشى زەرتتەۋ نيدەرلاندتا جۇرگىزىلگەن. زەرتتەۋشىلەر جەتى جىل بويى ادامداردىڭ دوستىق بايلانىسى مەن نوستالگيا دەڭگەيىن باقىلاپ وتىرعان. ۋاقىت وتە كەلە دوستارىمىزدان الىستايتىنىمىز راس, بىراق وتكەنمەن بايلانىسىن ۇزبەگەن, جۇرەك تۇكپىرىندە سونى ساقتاعان ادامدار جاقىن ورتاسىن جوعالتپايدى ەكەن. ال وتكەنىن اڭسامايتىن جانداردىڭ دوستارى ازايا تۇسكەن. ساعىنىش – تىلسىم بايلانىس, ال بايلانىس ۇزىلمەگەن جەردە ادام جالعىز قالمايدى. وسىلايشا, نوستالگيا – جاي ءتاتتى مۇڭ ەمەس, الەۋمەتتىك تۇراقتىلىقتىڭ, رۋحاني بەرىكتىكتىڭ بەلگىسى دەگەن بايلام جاسالعان.
