قازاقستان حالىقارالىق دەڭگەيدە مويىندالعان ەپيزووتيالىق قولايلىلىق جۇيەسىن جۇيەلى تۇردە نىعايتىپ كەلەدى. بۇل ەلىمىزدىڭ ۆەتەريناريالىق قاۋىپسىزدىك دەڭگەيىنىڭ جوعارى ەكەنىن جانە اتالعان سالادا جۇرگىزىلىپ جاتقان رەفورمالاردىڭ تيىمدىلىگىن ايقىن كورسەتەدى.
قازاقستان ۇكىمەتى جۇزەگە اسىرىپ وتىرعان جۇيەلى شارالار مەن ۆەتەريناريالىق قىزمەتتى جاڭعىرتۋ ناتيجەسىندە جانۋارلاردىڭ اسا قاۋىپتى اۋرۋلارىنىڭ الدىن الۋ جانە ولاردى باقىلاۋ باعىتىندا ەلەۋلى جەتىستىكتەرگە قول جەتكىزىلدى.
2025 جىلى ەلىمىزدىڭ وڭتۇستىك-شىعىس وڭىرلەرىندە اۋسىل اۋرۋى بويىنشا, سونداي-اق جوعارى پاتوگەندى قۇس تۇماۋى, افريكالىق شوشقا وباسى, كلاسسيكالىق شوشقا وباسى جانە افريكالىق جىلقى وباسى بويىنشا قاۋىپسىز ەل مارتەبەسىن قالپىنا كەلتىرۋ جانە حالىقارالىق دەڭگەيدە مويىنداتۋ باعىتىندا اۋقىمدى جۇمىستار اتقارىلدى.
قول جەتكىزىلگەن ناتيجەلەر وتاندىق ونىمدەردىڭ ەكسپورتتىق الەۋەتىن ايتارلىقتاي كەڭەيتىپ, جاڭا شەتەلدىك نارىقتارعا جول اشتى.
اتاپ ايتقاندا, قىتاي قازاقستاننان سويىسقا ارنالعان ءىرى قارا مالدى, ءىرى قارا تەرىلەرىن جانە قۇس ەتىن يمپورتتاۋعا رۇقسات بەردى. ازەربايجان تۇيە, ءىرى جانە ۇساق مال ەتى, قۇس ەتى, ءسۇت ونىمدەرى, بال جانە بالىق ونىمدەرىن اكەلۋگە مۇمكىندىك اشتى. موڭعوليا ءتىرى ۇساق مال يمپورتىن باستاۋعا كەلىسىم بەردى. يراك سويىسقا ارنالعان ءىرى جانە ۇساق مال جەتكىزىلىمدەرىن ماقۇلدادى. گرۋزيا سويىسقا ارنالعان ءىرى قارا مالدى, سونداي-اق سويىسقا جانە وسىرۋگە ارنالعان ۇساق مالدى يمپورتتاۋعا رۇقسات ەتتى. يران تۇياقتى جانۋارلاردىڭ تەرىسى مەن جۇنىنە ءوز نارىعىن اشسا, ەۋروپالىق وداق ەلدەرى قازاقستاندىق بال ونىمدەرىن قابىلداي باستادى.
ەكى جىلعا سوزىلعان كەشەندى جۇمىس ناتيجەسىندە, 2026 جىلعى 22 مامىردا دۇنيەجۇزىلىك جانۋارلار دەنساۋلىعى ۇيىمىنا مۇشە 183 ەلدىڭ دەلەگاتتارى ءبىراۋىزدان قازاقستانعا ۆاكتسيناتسيا جۇرگىزىلەتىن اۋسىلدان تازا ايماق مارتەبەسىن بەرۋ تۋرالى شەشىم قابىلدادى. رەسمي سەرتيفيكات قازاقستان دەلەگاتسياسىنا پاريج قالاسىندا وتكەن ۇيىمنىڭ 93-ءشى باس سەسسياسى بارىسىندا تابىستالدى.
وسىلايشا, بۇگىندە قازاقستاننىڭ بۇكىل اۋماعى اۋسىل اۋرۋىنان ۆاكتسيناتسيا ارقىلى قورعالعان ءارى حالىقارالىق دەڭگەيدە مويىندالعان قاۋىپسىز ايماقتارمەن قامتىلعان. قازاقستان ورتالىق جانە شىعىس ازيادا مۇنداي مارتەبەگە يە بولعان جالعىز مەملەكەت.
بۇل — ۆەتەريناريالىق قاۋىپسىزدىكتى قامتاماسىز ەتۋ, ەلدىڭ بيولوگيالىق قورعانىسىن كۇشەيتۋ جانە اگروونەركاسىپتىك كەشەننىڭ ەكسپورتتىق الەۋەتىن دامىتۋ باعىتىنداعى سىندارلى مەملەكەتتىك ساياساتتىڭ جارقىن ناتيجەسى.
قازاقستاننىڭ اۋىل شارۋاشىلىعى مينيسترلىگى ۆەتەريناريالىق قاۋىپسىزدىكتى ودان ءارى نىعايتۋ, ەكسپورت گەوگرافياسىن كەڭەيتۋ جانە وتاندىق اۋىل شارۋاشىلىعى ونىمدەرىنىڭ الەمدىك نارىقتاعى باسەكەگە قابىلەتتىلىگىن ارتتىرۋ جۇمىستارىن جالعاستىرادى.
