فوتو: اشىق دەرەككوز
قما رەسمي وكىلى ەرجان تايجاننىڭ ايتۋىنشا بۇل رەتتە كولىك قۇرالىنىڭ جاسىنا قاراي باستاپقى تىركەۋ الىمدارىنىڭ مولشەرلەمەسى تومەندەتىلەدى.
«سوڭعى ءۇش جىل ىشىندە اگەنتتىكتىڭ اۋماقتىق دەپارتامەنتتەرى كولىك قۇرالدارىن باستاپقى تىركەۋ ءۇشىن الىم تولەۋدەن جالتارۋ فاكتىلەرى بويىنشا 88 قىلمىستىق ءىستى تەرگەدى. بۇل ىستەر بويىنشا 1 800-دەن استام اۆتوكولىك زاڭسىز تىركەلگەن. مەملەكەتكە كەلتىرىلگەن زالال 11,8 ملرد تەڭگەنى قۇرادى», دەدى ە.تايجان.
ونىڭ مالىمەتىنشە كۇدىكتى رەتىندە 70 ادام تانىلعان, ولاردىڭ قاتارىندا اكىمشىلىك پوليتسيا باسقارماسىنىڭ باسشىلارى مەن قىزمەتكەرلەرى, «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ وكىلدەرى جانە نوتاريۋستار بار.
ناتيجەسىندە مەملەكەتكە 900 ملن تەڭگە كولەمىندە الىمدار تولەنگەن. سونىمەن قاتار, قۇنى 31 ملرد تەڭگە بولاتىن 1 500 اۆتوكولىككە جانە 968 ملن تەڭگەنىڭ كۇدىكتىلەرگە تيەسىلى مۇلكىنە تىيىم سالىنعان. ماسەلەن, اقمولا وبلىسىندا اكىمشىلىك پوليتسيا باسقارماسىنىڭ قىزمەتكەرى بار توپقا قاتىستى ۇكىم شىعارىلدى. ولار 2020 - 2022 جىلدار ارالىعىندا 55 جۇك كولىگىن زاڭسىز باستاپقى تىركەۋ ارقىلى مەملەكەتكە 401 ملن تەڭگە كولەمىندە زالال كەلتىرگەن. سوت ولاردى 2,5 جىل مەرزىمگە باس بوستاندىعىنان ايىردى.
سونىمەن قاتار مەملەكەت كىرىسىنە جالپى قۇنى 125 ملن تەڭگەنى قۇرايتىن 3 پاتەر مەن جەكە تۇرعىن ءۇي, سونداي-اق 21 ملن تەڭگە اقشالاي قاراجات تاركىلەندى.
قارجى مونيتورينگ اگەنتتىگى ازاماتتاردان ەكونوميكالىق قۇقىق بۇزۋشىلىق جاساۋ فاكتىلەرى بەلگىلى بولسا, بۇل تۋرالى «افم Insider» تەلەگرام بوتىنا حابارلاۋدى سۇرايدى. انونيمدىلىككە كەپىلدىك بەرىلەدى.
