فوتو: اشىق دەرەككوز
بەس كۇن ىشىندە ەلىمىزدىڭ بارلىق وڭىرلەرىندەگى مەديتسينالىق-سانيتاريالىق العاشقى كومەك ۇيىمدارى مەن جاستار دەنساۋلىعى ورتالىقتارىندا اشىق ەسىك كۇندەرى ءوتتى. رەپرودۋكتيۆتىك جاستاعى ەرلەر مەن ايەلدەر, جاسوسپىرىمدەر مەن جاستار كونسۋلتاتسيالىق جانە اقپاراتتىق قولداۋ الدى. سونداي-اق وتباسىن جوسپارلاۋ, ايەلدەردىڭ دەنساۋلىعى, ەرلەردىڭ دەنساۋلىعى, جاستار جانە ججبي, اپۆ پروفيلاكتيكاسى سياقتى جەكە تاقىرىپتارعا ارنالدى.
«اپتانىڭ نەگىزگى قورىتىندىلارىن شىعارا وتىرىپ, دەنساۋلىق ساقتاۋ مينيسترلىگىنىڭ جەلىسى بويىنشا رەسپۋبليكا كولەمىندە 14 350 ءىس-شارا وتكىزىلگەنىن اتاپ وتكەن ءجون. جالپى جوبا 358 498 قازاقستاندىقتى قامتىدى, ولاردىڭ ىشىندە 83 389 ەر ادام, 157 476 ايەل جانە 117 633 ءجاسوسپىرىم بار. گينەكولوگتار, ۋرولوگتار, ينفەكتسيونيستەر جانە باسقا دا مامانداردىڭ قاتىسۋىمەن 3 636 اعارتۋشىلىق كەزدەسۋ مەن ءدارىس ءوتتى», دەپ حابارلادى مينيسترلىكتىڭ ءباسپاسوز قىزمەتى.
اپتالىق اياسىندا باق-تا 238 ساراپتامالىق پىكىر, سۇحبات پەن بايانداما جاريالانعان. حالىقتىڭ ەڭ بەلسەندى قاتىسۋى مەن قىزىعۋشىلىعى الماتى, استانا قالالارىندا, سونداي-اق اقتوبە, تۇركىستان جانە قاراعاندى وبلىستارىندا بايقالعان.
سونىمەن قاتار جاسوسپىرىمدەرگە ەرەكشە نازار اۋدارىلعان. 117 مىڭنان استام بالا دەنساۋلىق پەن اۋرۋلاردىڭ پروفيلاكتيكاسى تۋرالى سەنىمدى اقپاراتقا قول جەتكىزگەن. دارىگەرلەر مەن ماماندار مەكتەپتەر مەن كوللەدجدەردە عانا ەمەس, تسيفرلىق ورتادا - الەۋمەتتىك جەلىلەر مەن تەلەارنالار ارقىلى دا جۇمىس جۇرگىزگەن.
«رەپرودۋكتيۆتىك دەنساۋلىق مادەنيەتىن جانە پروفيلاكتيكالىق مەديتسينانى دامىتۋ — بولاشاق ۇرپاقتىڭ دەنساۋلىعىنا قوسقان ەڭ ماڭىزدى ۇلەس. بارلىق وڭىرلەرگە, مەديتسينا قىزمەتكەرلەرىنە, ارىپتەستەر مەن باق-قا بەلسەندى قاتىسقانى ءۇشىن العىس بىلدىرەمىز. رەپرودۋكتيۆتىك دەنساۋلىق اپتالىعى — مەملەكەت, دەنساۋلىق ساقتاۋ جۇيەسى مەن قوعامنىڭ كۇشىن بىرىكتىرەتىن جىل سايىنعى باستاماعا اينالادى», دەدى قر دەنساۋلىق ساقتاۋ مينيسترى اقمارال ءالنازاروۆا.
