فوتو: اشىق دەرەككوز
جوعارى اۋديتورلىق پالاتانىڭ تاپسىرماسى بويىنشا قۇس ەتىن ءوندىرۋ جانە وتكىزۋ نارىعىنداعى باسەكەلەستىككە جوسپاردان تىس تالداۋ جۇرگىزىلگەن. اۋىل شارۋاشىلىعىن سۋبسيديالاۋعا بولىنگەن بيۋدجەت قاراجاتىنىڭ پايدالانىلۋىنا جۇرگىزىلگەن اۋديتتەن كەيىن وسىنداي زەرتتەۋ جۇرگىزۋ قاجەتتىگى تۋىندادى. ماقساتى – نارىقتا ۇستەم نەمەسە مونوپوليالىق جاعدايدى يەلەنگەن قاتىسۋشىلاردى انىقتاۋ, باعانىڭ قالاي وزگەرگەنىن قاداعالاۋ, سونداي-اق قولدانىستاعى مەملەكەتتىك قولداۋ شارالارىنىڭ سالاداعى باسەكەلەستىككە قالاي اسەر ەتەتىنىن باعالاۋ.
سونىمەن, جوسپاردان تىس تالداۋ بىلتىر قازاقستاندا 358,7 مىڭ توننا قۇس ەتى وندىرىلگەنىن, ونىڭ 42 مىڭ تونناسى ەكسپورتقا شىعارىلعانىن كورسەتتى. ال يمپورت كولەمى 135,7 مىڭ توننا بولعان, ياعني ىشكى نارىق يمپورتتىق ونىمگە ءالى دە جوعارى دەڭگەيدە (بۇل شامامەن 30%) تاۋەلدى بولىپ وتىر.
مەملەكەتتىك اۋديت ناتيجەسىندە شاعىن وندىرۋشىلەرگە مەملەكەتتەن قولداۋ الۋعا بوگەت جاسايتىن كەدەرگىلەر انىقتالدى. ساراپتاۋ بارىسىندا بەلگىلى بولعانىنداي, شاعىن وندىرۋشىلەردىڭ مەملەكەتتەن قولداۋ الۋىنا كەدەرگى كەلتىرەتىن كۇردەلى راسىمدەر كوپ. ءوتىنىم بەرۋ مەرزىمدەرى تىعىز, تالاپ ەتىلەتىن قۇجاتتار توپتاماسى قالىڭ. ناتيجەسىندە ناقتى وندىرىستىك الەۋەتى بار كوپتەگەن كومپانيا ءىس جۇزىندە قولداۋ جۇيەسىنەن اجىراپ قالىپ وتىر. بۇعان قوسا سۋبسيديا العان كەيبىر وندىرۋشىلەردىڭ تۇپكىلىكتى باعاسى مەملەكەتتىك قولداۋ الماعاندارعا قاراعاندا اناعۇرلىم جوعارى.
احۋالدى جاقسارتۋ ءۇشىن باسەكەلەستىكتى قورعاۋ جانە دامىتۋ اگەنتتىگى اۋىل شارۋاشىلىعى مينيسترلىگىنە ءتيىستى ۇسىنىمدار جولدادى. مەملەكەتتىك اۋديت قورىتىندىسى بويىنشا جوعارى اۋديتورلىق پالاتانىڭ باسقا دا تاپسىرمالارى تولىق ورىندالعانعا دەيىن باقىلاۋدا بولادى.
