پاۆلودار وبلىسى جەلەزين اۋداندىق سوتى جەلەزين اۋداندىق جۇمىسپەن قامتۋ ورتالىعىنىڭ ديرەكتورى مەن ونىڭ قاراماعىنداعى ەكى قىزمەتكەرگە, سونداي-اق ولاردىڭ سىبايلاسى بولعان ءۇش ازاماتقا قاتىستى قىلمىستىق ءىستى قارادى. كىنالى تۇلعالار بيۋدجەت قاراجاتىن اسا ءىرى مولشەردە تالان-تاراجعا سالۋ, سونداي-اق الاياقتىق پەن قۇجاتتاردى قولدان جاساۋ دەرەكتەرى بويىنشا ايىپتالدى.
- 2021 جىلدىڭ قاڭتار ايىنان 2024 جىلدىڭ ساۋىرىنە دەيىنگى كەزەڭدە ازامات ت., جۇمىسپەن قامتۋ ورتالىعىنىڭ قىزمەتكەرلەرى ا., س. جانە ازاماتتار ا., ك., ج.-نىڭ كومەكتەسۋىمەن جالپى سوماسى 110 332 622 تەڭگە بيۋدجەت قاراجاتىن جىمقىرعان. قىلمىستىق ارەكەتتەر جالاقىنى زاڭسىز تولەۋ, قونىس اۋدارۋعا ماتەريالدىق كومەك كورسەتۋ, ءۇشىنشى تۇلعالارعا جاردەماقى بەرۋ ارقىلى جاسالعان. سوتتالۋشىلاردىڭ كىناسى كۋالاردىڭ, جابىرلەنۋشىلەردىڭ وكىلدەرىنىڭ, سوتتالۋشىلاردىڭ وزدەرىنىڭ ايعاقتارىمەن جانە ءىس ماتەريالدارىمەن دالەلدەندى,-دەپ حابارلادى وبلىستىق سوتتىڭ ءباسپاسوز قىزمەتىنەن.
سوت قىلمىستىق ءىستى قاراي كەلىپ, ت.-عا 7 جىل, جۇمىسپەن قامتۋ ورتالىعىنىڭ قىزمەتكەرى ا.-عا 3 جىل باس بوستاندىعىنان ايىرۋ جازاسىن تاعايىندادى. ەكەۋى دە ءومىر بويىنا مەملەكەتتىك قىزمەتتە جۇمىس ىستەۋ قۇقىعىنان ايىرىلدى. وزگە سوتتالۋشىلاردىڭ جازانى جەڭىلدەتەتىن ءمان-جايلارى مەن كەلتىرىلگەن زياندى وتەۋلەرى ەسكەرىلىپ, 2 جىلدان 4 جىلعا دەيىن باس بوستاندىقتارى شەكتەلدى. ولارعا پروباتسيالىق باقىلاۋ بەلگىلەنىپ, ءماجبۇرلى جۇمىسقا تارتۋ جازاسى تاعايىندالدى.
پاۆلودار وبلىسى
