رەسمي مالىمەتكە سايكەس, وتكەن جىلى 15,7 مىڭ گەكتار, ال بيىلعى جىلى 14,3 مىڭ گەكتار جەردىڭ ماقساتقا ساي پايدالانىلماي جاتقانى انىقتالعان. مۇنداي ۋچاسكەلەر — اۋىل شارۋاشىلىعى اينالىمىنا تارتىلماعان, ينفراقۇرىلىم نەمەسە وندىرىستىك جوباعا اينالدىرىلماعان بوس جاتقان اۋماقتار.
2024 جىلى 4230 گەكتار جايىلىمدىق جەر مەملەكەتتىك بوسالقى جەر قورىنا قايتارىلعان. ونىڭ ىشىندە 668,9 گەكتارى جەر يەلەرىنىڭ ەرىكتى تۇردە قايتارۋىمەن, ال 339,2 گەكتار جەر قوناەۆ قالالىق سوتىنىڭ شەشىمىمەن مەملەكەت مەنشىگىنە ءوتتى.
بيىل جىلدىڭ باسىنان بەرى 1490 گەكتار جەر سوت شەشىمىمەن مەملەكەتكە قايتارىلسا, 150 گەكتار جەردى يەلەرى ءوز ەركىمەن بەرگەن.
سونىمەن قاتار 1121 گەكتار جەرگە قاتىستى ماتەريالدار الماتى وبلىسىنىڭ جەر رەسۋرستارىن باسقارۋ دەپارتامەنتىنە جولدانىپ, سالىق مولشەرلەمەسىن 20 ەسەگە دەيىن ارتتىرۋ شارالارى قاراستىرىلعان.
بۇل جۇمىستاردىڭ ماقساتىنا كەلەر بولساق, جەر – مەملەكەتتىڭ ەكونوميكالىق جانە الەۋمەتتىك رەسۋرسى. ونى ماقساتسىز يەمدەنۋ نەمەسە پايدالانباۋ – زاڭ بۇزۋشىلىق قانا ەمەس, قوعام يگىلىگىنەن تىس قالدىرۋدى بىلدىرەدى.
مەملەكەت پايدالانىلماي جاتقان جەرلەردى قايتارۋ ارقىلى اۋىل شارۋاشىلىعى ءوندىرىسىن دامىتۋعا, جاڭا ينۆەستيتسيالىق جوبالاردى جۇزەگە اسىرۋعا, ينفراقۇرىلىم جۇرگىزۋگە جانە جايىلىم تاپشىلىعى ماسەلەسىن شەشۋگە جول اشادى.
قوناەۆ قالاسى اكىمدىگى بۇل باعىتتاعى جۇمىستاردى جالعاستىرىپ, جەر پايدالانۋشىلارعا جەردى ءتيىمدى يگەرۋ جونىندە تالاپتاردى ەسكە سالدى. تالاپ ورىندالماعان جاعدايدا زاڭ اياسىندا ءتيىستى شارالار قابىلدانباق.
الماتى وبلىسى.
