سوڭعى ءبىر جىلدا قازاقستاندا شاعىن جانە ورتا بيزنەستىڭ نەگىزگى كورسەتكىشتەرى ءوسىم كورسەتتى. بۇل جونىندە قر ۇلتتىق ەكونوميكا مينيسترلىگىنىڭ كاسىپكەرلىكتى مەملەكەتتىك قولداۋ جانە قورعاۋ دەپارتامەنتىنىڭ ديرەكتورى دارىن ءابدۋالي رەسمي ستاتيستيكاعا سۇيەنە وتىرىپ مالىمدەدى.
«2024 جىلدىڭ ءتورتىنشى توقسانىنىڭ قورىتىندىسى بويىنشا شاعىن جانە ورتا بيزنەستىڭ ەل ەكونوميكاسىنداعى ۇلەسى 39,7%-عا جەتتى. بۇل كورسەتكىش 2023 جىلدىڭ سايكەس كەزەڭىمەن سالىستىرعاندا 3,2 پايىزعا جوعارى (سول كەزدە 36,5% بولعان)», دەدى ول.
سونداي-اق, جۇمىسپەن قامتىلعاندار سانى 2,2%-عا ءوسىپ, 4,4 ميلليون ادامعا جەتكەن. 2023 جىلى بۇل كورسەتكىش 4 322 093 ادامدى قۇراعان بولاتىن.
«شاعىن جانە ورتا بيزنەس ونىمدەرىنىڭ ءوندىرىسى دە ايتارلىقتاي ارتتى. 2024 جىلدىڭ ءتورتىنشى توقسانىندا بۇل كورسەتكىش 81 تريلليون تەڭگەنى قۇرادى, بۇل 2023 جىلدىڭ ءدال وسى كەزەڭىمەن سالىستىرعاندا 19,2%-عا كوپ (بىلتىر – 68,7 ترلن تەڭگە)», دەپ تولىقتىردى دارىن ءابدۋالي.
