فوتو: اشىق دەرەككوز
اتالعان جارىس اقش ۇلتتىق ۇلانىنىڭ ۇيىمداستىرۋىمەن سەرجانتتار قۇرامىنىڭ كاسىبي شەبەرلىگىن باعالاۋ ماقساتىندا وتكىزىلىپ كەلەدى. بيىلعى بايقاۋعا امەريكا قۇراما شتاتتارىنىڭ جەتى شتاتىنان, سونداي-اق فيدجي, گۋام, تونگا جانە فيليپپين ەلدەرىنەن كەلگەن اسكەري قىزمەتشىلەر قاتىستى. قاتىسۋشىلارعا اسكەري فيتنەس تەستتەن باستاپ, تاكتيكالىق دايىندىق, جاۋىنگەرلىك مەديتسينا, توپوگرافيا, پاترۋلدىك تاپسىرمالار, سونداي-اق م-240ۆ پۋلەمەتى, م-4 ۆينتوۆكاسى, م-17 تاپانشاسىمەن اتۋدان باستاپ 12 كەلىلىك جۇكپەن 28 شاقىرىمدىق مارش-بروسوكقا دەيىنگى كۇردەلى سىناقتار ۇسىنىلدى.
وتكىزىلگەن سىناقتار باراسىندا وتانداستارىمىز ەرەكشە ناتيجەلەرىمەن كوزگە ءتۇستى. اتاپ ايتقاندا, سەرجانت دارحان اسلان 800 مەتر قاشىقتىقتى 2 مينۋت 5 سەكۋندتا جۇگىرىپ ءوتىپ, بايقاۋ تاريحىندا بۇرىن-سوڭدى بولماعان رەكورد ورناتتى. بۇدان بولەك, ول 28 شاقىرىمدىق مارش-بروسوكتى 3 ساعات 39 مينۋتتا اياقتاپ, توزىمدىلىك پەن رۋحتىڭ جارقىن ۇلگىسىن كورسەتتى.
ال گۆارديا سەرجانتى راۋان توقتاربەكوۆ قارۋ-جاراقپەن اتۋدان بارىنشا دالدىك تانىتىپ, «ۇزدىك مەرگەن» اتاعىنا يە بولدى. ول اقش ارمياسى قولداناتىن قارۋ ۇلگىلەرىنەن وق اتۋدا ۇزدىك ناتيجە كورسەتىپ, ارنايى سەرتيفيكاتپەن ماراپاتتالدى.
گەنەرالدىق شتابتىڭ سەرجانتتار قۇرامىمەن جۇمىس باسقارماسىنىڭ اعا نۇسقاۋشىسى, شتاب-سەرجانت بەگلان بەيساليەۆ جارىستىڭ جوعارى دەڭگەيدە وتكەنىن اتاپ ءوتتى:
«قاتىسۋشىلاردىڭ كوپشىلىگى – تاجىريبەلى اسكەري ماماندار. سوعان قاراماستان, ءبىزدىڭ سەرجانتتار وزدەرىنىڭ كاسىبي شەبەرلىگىن, رۋحىن, دايىندىق دەڭگەيىن ناقتى ىسپەن دالەلدەدى. بۇل — قازاقستان ارمياسى ءۇشىن ۇلكەن ماقتانىش,» دەدى ول.
بايقاۋ سوڭىندا ساربازدار مارەگە مەملەكەتتىك تۋمەن جەتىپ, حالىقارالىق ارەنادا ەل نامىسىن قورعاپ شىقتى. قورعانىس مينيسترلىگىنىڭ مالىمەتىنشە, بۇل جەتىستىك – سەرجانتتار قۇرامىنىڭ جۇيەلى دايىندىعى مەن حالىقارالىق تاجىريبەگە اشىقتىعىنىڭ ناتيجەسى.
ارايلىم مىرزاحان, ەۇۋ 2 كۋرس ستۋدەنتى
